De warachtighe fabulen der dieren

[p. 92]

[Partrijse ende Haenen]

Men moet nemen verdrach,

Alst niet anders zyn mach.

Iob. 5.

DIe van God ghestraft wert, zalich es die man
Daerom veracht des Heeren castidijnghe niet:
Want hy wondt, oock ghenesijnghe gheuen can
Hy slaet, en daer naer dan
Zijn handen sullent ghenesen ziet,
Laet ons lijdzamich wesen in alle verdriet
Wat ons gheschiet, ende wie ons mesbiet.

Sapien. 3.

IN veel dijnghen, met quellayge verdict
Onse hope zy
Want in veel dijnghen, wel beschict
Zullen worden wy

[p. 93]

Partrijse ende Haenen.

EEn Aerbeyder heeft t'zijnder ghenouchte ghezocht
Een Partrijse ghecocht
Die Haenen, Hennen, hadde een groote preste
Neerstelick heeft hijse t'huusewaerts ghebrocht
En zoo hy hadde ghedocht
Lietse mede vlieghen, met d'ander te neste,
De Haens queldense, zoo oock deden de reste:
t'Hoender-mesch ded'hem insghelijcx groot quellen
Nietmin al was zy versteken, keerdet int beste
Docht, was vreemde, ende niet van huer meghezellen,
Die paeys zouct, sal paeyzelick middel voortstellen.

¶ Al deden zy de Partrijse veel vercleens

Haer bevecheende dickwils daer te vooren
Zy zach de Haenen warent nemmermeer eens
Daghelicx vochten zy, en stekende met spooren:
De Partrijse ziende zulckdaenich oorbooren
Dat de Haenen ieghens Haenen zoo vyandich waren,
Docht t'was costume: Dus zonder verstooren
Wilder hem lijdzamelick mede paren:
Daer mede men bescheipt es, moetmen ouer varen.

Insghelijcx zul'wy achten licht als een plume

Ende min dan den waterschume
Van alsulcken menschen licht veerdich verdraeghen
De ghone diet hebben by ghewoonlicke costume
Den anderen te quellen, t'allen daghen
Latense vloucken, rampen, euelen, plaghen,
Daer naer niet vraghen: Zoucken ons selfs vrede,
Zoo leef'wy in de meeste gherustichede,