De warachtighe fabulen der dieren

[p. 94]

[Vvolf ende Eghele]

Ieghens dijn vyanden zijt,

Wel voorzien altijt.

1. Petri. 5.

ELck sal sober ende waeckende wesen
Want ons wederpartie, den vyandt nacht en dach
Als een briesschende Leeu, sterck opgheresen
Ommerijght onslieden, ende bouen desen
Zouct listelick wien hy verslinden mach
Den welcken (eer hy crijght zijn beiach)
Serpentich ende oudtschalckich quaet
De stercke int ghelooue wederstaet.

[p. 95]

Vvolf ende Eghele.

DEn Eghel ieghens haer pertien voorzien
Van scherp stekende burstelen die d'ander vlien
Als wapene, heeftse die daghelicx ghedreghen
Een Wolf wasser verhonghert op, maer mids dien
Datse zoo opgheburstelt stondt, wasser te min toe gheneghen
De Wolf zocht nochtans by loose boose weghen
Haer te bedrieghen, en heeft smeeckende ghezeyt
Datse haer scherpe schichten yeghelick tseghen
Altijts zoo ghereedt drouch, was te grooten aerbeyt
En dat die behoorden wesen neder gheleyt
Eist dat v greyt (sprack hy) ghy zultse aflegghen
Tes goet altijts voorzien zyn, ieghens die quellen.

¶ Hoe (zeyde den Wolf) doet datmen v heete

Mijn lieue dreete
Tes paeys en vrede, leght v wapenen af
Ick en draeghe ieghens v gheenssins veete
Neen ick, bijden zweete
Ende blijft gheburstelt staende sterckstekende straf:
Neen neen, zey den Eghel, en dese andtwoorde gaf
Lieuer heb ick te ghaene op myn verweeren,
Want comt my yemandt op, met een loopende draf
Te min mach hy my onverzienelick deeren
Tdeen mes houdt t'dander in schee, in alle affeeren.

Zoo heeft yeghelick mensche hier by vermaen

Dat hij moet voorsienich staen
Ieghens de bedrieghers listighe laeghen
Altijt ieghens alle man ghewapent ghaen
Met ghepeynsen, voorziende toecommende plaeghen:
Hy es sterck die wijselick can zoorghe draghen.