De warachtighe fabulen der dieren

[p. 90]

[Elephant ende Draecke]

Alle quaet, hoe beromt,

Van elcx daet, eerst zelue comt.

Prouerb. 11. b 18. Esa. 57.

DEr godloosen aerbeyt
Sal faulte slaen:
Maer die inder waerheyt
Recht henen gaen,
Zullen goed ontfaen.

Esai. 32.

ARgher ghereedtscepen en zijnder gheen
Dan alder quaetst, die de bedriegher can verweruen
Want hy heeft ghedachten gheraemt by een
Omme de zachtmoedighe te moghen bederuen

[p. 91]

Elephant ende Draecke.

DE bloedtghulzighe blaeckende venineghe Draecke
Houdt altijts waecke
Den Elephant vervolghende om zijn bloet:
Als door een gheduereghe nijdeghe wraecke
Om t'zijnder wille crijghen, dees practijcke doet
Den steert knoopt hy ontrent des Elephants voet
d'Elephant dat ontdoende met zijn snauel dan
Zoo vliecht de Draecke den Elephant met eenen moedt
In d'Ooghe ende Nuese, daer zy an gheraken can,
Die hem niet helpen mach, moet zijn verwonnen man.

¶ Dus den Elephant hebbende te wille ghecreghen

Es dan gheneghen
Zijn bloet gheheel wt te zughene daer
Zoo datse bloetdronckich wort zadt bedeghen
Nochtans Naturalisten te zegghen pleghen
Een Elephants bloet es haer een tueghe maer:
Dus dan ouerdroncken zijnde, t'ghebuert daer naer
Dat zy valt ter eerden door zulcken noodt
Den Elephant zijnde onmachtich ende zwaer
Valt de Draecke dicwils dan zelue doodt,
Zulck waent ander deeren, comt zelf in lijden groot.

Sghelijcx zijnder menschen bloedghulsigh en venijnelic

Die naulistich
Zoucken t'vleesch ende bloet van d'onnoosel dach nacht
Hem zeluen verzaedende, werden verdwijnelic
Huer zoet wert ten eunde bitter en pijnelic
Haest onderworpen ligghende versmacht:
Vermoorden huers selfs, daer den vyandt om lacht,
Alleene gheel tsweerelts pacht, wilden wel beiaghen,
Hem meer op laedende, dan zij connen draghen.