De warachtighe fabulen der dieren

[p. 88]

[Vvolf ende Vos]

Zulck die benijden,

Commen zelf in lijden.

Leuiti. 14.

VWen naesten sult ghy gheen onghelijck doen
Noch hem oock beroouen, in gheen faeysoen.

Prouerb. 10.

GHeen nijdt in dijn herte vrouch noch laete
Hebt ieghens uwen Broeder, t'sou de ziele schaden
Haet verwect twist, maer de Charitaete,
Can bedecken certeynelick alle mesdaden.

Eccle. 14.

DIe vergadert onrechtuaerdelick wt zijnen moedt
Die vergadert den anderen, ende in zijn goedt
Sal een andere ouerdaedichede
Hebben, ende wellustichede.

[p. 89]

Vvolf ende Vos.

DE Vos heeft den Wulf in zijn Legher bezocht
Die vol was ghebrocht
Van roof, aes, en theercost,
Diueersch in manieren,
t'Welcke verionnende, hadder gheen angherocht
Met eenighe loosheyt, die hy heeft ghedocht
Maer conster niet an, ydel was zijn anthieren
Een nijdicheyt ghijnck hy dies haest verzieren
t' Wolfs legher den Schaep-heerder te kennen gheuen
Die hem op zyn weecste vandt om schoffieren
Zoo dat den Wolf es onder zyn cudde bleuen
Vos esser in ghedreuen, hem verzaed met ghemaecke
Verborghen nijdt, es een quader zaecke.

¶ De Vos vuld'hem gheel totten croppe toe zat

Van s'Wolfs prouanche weeldich en brat
Zoo dieftelick ende verraderlick adt
Oorzaeke vanden moort, op den Wulf ghebuert
Dus hebbende van deeghs zijn labaey ghehadt
t'Huuswaerts wtloopen heeft Vos gheauentuert
Maer onlancx hebben hem goe daghen gheduert
De benijder heeft zyn vergheldijnghe vonden
Rassechelick onder weghen, es worden verschuert
Onverzien zonder ghenaede van d'honden:
Weder wraecke t'dien stonden, was op hem niet ghesmalt
Altijts de zonde meest, op zijn meester valt.

Tsghelijcx zulck een anders wel varen benijdt

End' af-iondt, t' ghuent dat hy heeft bezoorght
Om dat listelijck crijghen, leght laeghen wijdt
Ende hem ontvrijdt
Maer tes een qua brocke, daermen an verwoorght.