De warachtighe fabulen der dieren

[p. 86]

[Esel ende t'Peert]

Yeghelick sal alst past,

Helpen draghen anders last.

Galat. 6.

HElpt den last
In allen dijnghen
Van elck anderen draghen
Zoo sult ghy vast
De wet Christi volbrijnghen,
Ende hem behaghen.

Luce. 6.

BEmindt uwen vyandt, doet wel, en bevrijdtse
De ghene die v haten, ende bedrieghen,
Die v vermalendiden, Ghebenedijtse:
Bidt voor de ghene die v belieghen.

[p. 87]

Esel ende t'Peert.

EEn Dorpman t'eender marct volghende naer
Heeft een vet Peert gheleedt, en zyn Esel mede,
Welcken Esel hy hadde ouerladen zeer zwaer
Ende t'Peert ghingh ydel in houeerdichede:
Den Esel badt dat hem t'Peert bystant dede
Of t'moeste gheheel onder t'last versmachten:
t'Peert heuet ontzeyt, dies daer ter stede
Den Esel gheuallen es in onmachten
Tes quaet verlasten yemant bouen zyn crachten.

¶ Doen was den Dorp-man vergramt, ende ouerziende

Dat t'Peert hadde den Esel bystant ontzeyt
Maecte dat t'Peert voor den Esel diende
En heuet t'pack het Ruyn op gheleyt
t'Schuumde, t'stampte, t'schraefde, want t'heeft hem mesgreyt,
Dat van hem s'Esels last moest zyn ghedreghen
Ende midts dat niet ghewone was te doene aerbeyt
Veel te min so wasser t'Peert toe gheneghen,
Onder weghen, ter deghen
Al waster seghen,
Heeft veel slaeghen ghecreghen:
Want die wederspoorich valt, dient somtijts ghesleghen;

Zien wy onsen naesten in eenighe last

En dat wy daer af zijn bevrijdt,
Laet ons daer in niet verhueghen vast
Maer hem liever (als bequamelick past)
Dien helpen draghen t'alder tijt.