De warachtighe fabulen der dieren

[p. 84]

[Arendt en Vosinne]

De cleene somtijts snel,

Hinderen de groote wel.

Deutero. 22.

DEn Osse of t'Schaep van uwen naesten sult ghy
Niet zien dolen, ende ghaen voorby
Maer tot uwen Broeder weder leeden daer
Al ist dat hy uwen na-ghebuer niet en zy
Ofte dat ghy hem niet en kent, so sult ghy daer naer
Die in v huus leen, by v laten blijuen eenpaer
Tot dat uwen Broerder die zoucken sal,
En die weder mach crijghen in zijnen stal.

[p. 85]

Arendt en Vosinne.

DEn Arendt Coninck vanden Voghelen meest
Vreezende voor gheen tempeest
Wandelde onbevreest
Vandt ionghe Voskins verdoolt zijnde wt haer weghen
Hy greepse, vloocher mede door t'Foreest
Heeftse op een Boom zyn Ionghen int nest ghedreghen:
De Vosinne heeft hier af de wete creghen
En badt dat hy wilde huer Ionghskens weder gheuen in noot
Den Arendt hooghmoedich wasser niet toe ghenegen
De Vosinne vertrack aldus met gramschap groot.

¶ De Vosinne wederkeerende gram-moedich en fier

Vreesende gheen dangier, Al vandtset hier
Recht onder den nest daer zyn Ionghen keken
Heeft ghemaect en opgheblasen, een groot vier
Dies heeft den Arendt met de Ionghen inden roock ghesteken
Gedruckt vandt hy hem door dees cloucke treken
Hy const hem noch de zijne helpen, naer zyn begheeren
Hy wt-wierp d'huere, zou esser me wech ghestreken,
t'Vier rees, de zijne en const hy in tijts niet weeren.

Zo tsghelijcx een mensche van nederen staete

Mach wel een hoogher dan hy es, schadelick wesen
End' hy die de cleene want doen onbaete
Beschadicht hem zeluen, en es quaet om ghenesen:
Ende zoo men by de Naturalisten mach lesen
Veel groote Dieren, hebben meest al een cleene partie
Die hemlieden groot hinder doet: ter cause van desen,
Op zijn eyghen cracht te staene, es fantasie