De warachtighe fabulen der dieren

[p. 82]

[Ionckman ende Zvvalevve]

Op wanckelbaer zaken,

Gheen hope maken.

Iere. 29.

EN laet v niet verleeden van uwe Propheten
Die int middel van hulieden zijn ghezeten
End' v waerzegghers, t'welcke gheensins betame
En acht oock niet met lichtueerdich vermeten
Op de dromen die ghi droomt, want ghy moet weten
Dat zy valschelick voorzegghen in mynen namen
Ende hebse niet ghezonden, zeyd d'Heere eerzame.

Eccle. 34.

DIe Waerzegghers der dolijnghen, ende die
Wt der Voghelen zangh, oock mede
En die dromers der quaet-doenders fantasie,
Zijn al te zamen ydelhede.

[p. 83]

Ionckman ende Zvvalevve

EEn Ionghsken me zoontken diet al hadde verpepert
Bezonden niet meer meer dan zyn laetste cleet
Zach een Zwalewe vlieghen dweers en ghekepert
De wijnter was leden (die zwaricheyt stepert)
Doen docht hy de zomer staet te commen ghereet
Ick hebber al noch met dit rocxken te heet
En heeft hem van dit pandeken quijte ghemaect:
Hy en wilde niet riecken naer zyn ocxel zweet
Zoo hem stellende tot in zijn hemdeken naect
Wijs es hy die (alst tijt es) zoorchvuldich waect.

¶ Contrarie zyn hope, den wijnter cam an

Het haghelde, sneeude, woey wten noodt-oosten
Myn Ionghen weynschte om zyn habijtkens dan
Clippertant, en Snotvijnck, camen hem troosten:
De Coude hem op commende, dus ten boosten
Heeft de Zwalewe zien ligghen zwelten in t'snee:
Och (docht hy) waer sal ick my moghen roosten?
Ende sprack ghevouden ts'aerms, zeer ghedwee,
Door een ydel betrauwen, lijd'ick dese wee.

Als waerby al t'ghuent dat niet es ghedaen

Alst dient haestelick ofte traeghelick
Met voorzien matelick en wel beraen
De zulcke sal dat werden beclaghelick
Op wanckelbaer zaeken zijt v niet draghelick
Maer v reghelt op stantvasticheyt ghemaniert
Versint eer ghy beghint, v zaecken onversaghelick
Naer t'voghel-gheroup v niet en regiert.