De warachtighe fabulen der dieren

[p. 80]

[Landtsman ende Slanghe]

Gheen weldaet ofte dueght

Ghy met quaet loonen mueght.

Math. 5.

VVilt volghen dat goet es, in alle zaecken
Voor elck ander int bidden vromelick waecken
Ia bidden voor de ghene die v doen quaet:
Wel doen die v benijden, oft quellen met wraecken
Op dat ghi tshemelsch Vaders kinderen bescreuen staet
Want zyn zonne op goe ende qua schijnen laet,
En zendt reghen op rechtueerde wt liefden vierich:
Oock laet hy reghenen op al onrechtueerdich zaet
Op dat wy alle menschen, souden zyn goedertierich.

[p. 81]

Landtsman ende Slanghe.

EEn Landtsman wandelde in zijn wee
Te wijnter tijde, vandt onder de snee
Een Slanghe half doodt van coude bedeghen
Compassieus wesende t'huerwaerts ghedwee
Heeftse op ghenomen ende thuus ghedreghen
Inden eerdt es zou voor zyn vier gheleghen
d'Hitte beseffende, wiert fraey ende fijn
Tot haer quaetheyt als dan gheneghen
Naer t'veninich pleghen,
Heeft alomme gheschoten wt haer venijn:
Die quaet van natueren es, can niet duechdelick zyn.

¶ Den Landtsman vergramt der grooter onweerde

Een groot Bijl aenveerde,
Ende heefter die naer gheloopen te slane
Zou veninich ghewronghen, rees op vander eerde
Meende hem van huer venijn te doen ontfaene
Hem gheuende spijtlick noch te verstaene
Hy die grammoedich buter maten beefde
Van datse fraey wiert, niet anders waene
Haer groote duecht was, dat hy noch leefde
Serpentich zaet, was oyt quaet, met diesser aencleefde.

Weest niet ondancbarich in gheen saeysoen

Maer dancbarich die v verschoonen
Duecht, eere ende bijstandicheyt doen
Ende gheen duecht zult, met quaetheyt loonen
Met alle persoonen
Toocht altijts vriendthoudich ghelaet
t'Vought wel, als d'een handt d'ander dwaet.