De warachtighe fabulen der dieren

[p. 78]

[Vos ende Catten]

Ydel consten vzeren

Lettel profiteren.

Prouerb. 2. ende 19.

EIst dat de wijsheyt in v herte gaet
Ende kennense, can uwe zielen behaghen
Zoo sal v alsdan bewaren den raedt
En voorzienicheyt behouden v t'allen daghen
Ghy sult werden verlost, vanden wech der qua plaghen
Maer wetentheyt der zielen, ooc eyghelic hebben moet
Want hoe men andere willen constich draghen,
Daer die niet en es, daer en es gheen ander goet.

[p. 79]

Vos ende Catten.

DEn Vos ende Catten vergaedert wt ionsteren
Tsamen te couten begonsten
Onder een hoogh eecken boom t'samen etende:
Den Vos zey hy hadde den zaek der consten
Ende ieghens alle noodt was hem vermetende:
De Catten zeyden, maer een abelheyt wetende
Ende dat was t'claueren rasch zonder verflauwen
d'Welck zy niet gheerne zouden zyn verghetende
Ofte zoudender t'hooft dicwils moeten om crauwen
't'Zyn goede consten, daermen ter noodt op mach betrauwen.

¶ t'Ghesiede zy hoorden datter camen ghedauert

Van verre een groot hoop iaghonden gheloopen
In tijts hebben de Catten op den Boom gheclauert
Dochten zy camen omme haer pelsen af stroopen
Vos neue daer alleene stondt tusschen die hoopen
Zijnen zack der consten const hem niet baeten
Hy wiert ghegrepen by der necke, en moest becoopen,
Doe de Catten bouwen gherustelick zaeten:
Veel schalckheyt helpt niet, alsmer t'lijf moet laeten.

Zoo vijndtmer ooc vele hooghe int vermeten

Die wonderdijncx weten
Vol constighe secreten
Totten ooren inde wijsheyt ghezeten
Als Legisten, Iuristen, soo sij schijnen ghecleedt
Die veel provts ende contraen verzwelghen end' eten
Meest tafel studeerders om de lecker beten
En zulc om hem seluen helpen, gheen middel weet,
t'Cleen natuerlic verstandt, beschermt wel groot leedt.