De warachtighe fabulen der dieren

[p. 72]

[Het dier Chameleon]

Flatteerders nature,

Es diueersch van coluere.

Esai. 5. Oze. 7.

VVee die t'quaet goet noemt, ende tgoet quaet
Ende duysternisse stelt voor t'licht
En maect dat t'licht voor duysternisse staet
t'Bitter zoet maect, en t'zoete voor bitter sticht,
Alzulcke onghezwicht
Hebben t'zommigher tijt
In een fletsende habijt
In huerlieder quaetheyt den Coninghen verblijt
Ende om proffijt, te menigher stede:
In huerlieder lueghenen, den Princhen mede.

[p. 73]

Het dier Chameleon.

CHameleon t'viervoetich scherp gheclaeut dier
Altijts sterck metten ooghen openen staende
Byder lucht leuende, dies es zyn bestier
Met aessem en weder-aessemen lucht ontfaende
Zijn vel eerst eenweerdich coluerich staende
Can't veranderijnghe van alle verwen gheuen
Wtghesteken (zoo de naturaltste vermaende)
Root en wit, de coleuren zyn hem achterbleuen.

¶ Insghelijcx de Fletsers byder lucht leuen

Vanden volcke, zoo zy spreken, colurent naer
Groote Meesters zy involghen en aencleuen
Wat hy hemlieden oock wert bedreuen
Zoo zy aessemen t'Cameleon verkeert hem oock daer
Wt ghesteken tot root ende wit voorwaer
Te wetene tot reynicheyt ende schaemte,
Want zy volghen t'quaet, niet de deught eerbaer
Elck wacht hem daer vooren, als voor groote blaemte.

Pluumstrijckers, Vlabackers, Oorblasers, Fletsers,

Zijn inder Heeren bouen, als een mieren, nest,
Niet lichte root, onbeschaemde Ketsers
Onzuner, bevlect, meest coppelaers letsers
Leckervoordeel smetsers, Ten eynde cretsers
d'Heycke naer den wijndt hanghen, haer manieren, best,
Nacht dach elc sijn leße in sulc anthieren, vest.