De warachtighe fabulen der dieren

[p. 70]

[Ackerboer ende Muus]

In wercke daedich,

Zouct Vrienden ghestadigh.

Eccle. 25

ZAlich es hy die inder aerden leeft
Een warachtighen Vriendt gheuonden heeft
Ende om alle deught t'oorbooren,
De rechtueerdicheyt vertelt, der hoorender ooren.

Eecle. 6.

EEn ghetrauwe Vriendt, es een medicine
Des leuens, om bewandelen de aerdtsche padt
Stercke beschermenesse, t'allen sijne
Ende die dien vijndt, vijndt eenen schadt:
Vrienden zijnder oock dat tafel-ghezellen zijn in groots,
Maer die blijuen niet by inden dach des noots.

[p. 71]

Ackerboer ende Muus.

EEn Ackerboer cluchtboerdich die t'bierbanck anthierde
Veel cluchten verzierde,
In wiens herte niet lichte onghenoechte daecte
Eens tsiaers (ter eeren zyn gheboortdach) vierde
Dies hy voor zyn Pacht-hof een groot vier maecte
De vlamme (metten winde) ten huuse in-daecte
Ende niet en slaecte,
t'Brande dies ouer al, qualick costhijr tusschen
Hy zacher op dat zoo aen allen zijden blaecte
De timmerayge craecte,
t'Bleeffer al, hoenders, hennen, duuen, spreeuwen, musschen
Die zonder water stille staet, gheen brant can blusschen.

¶ Coeyen, Caluers, Zwijnen, hoe lettel int hoopen

Moestent mede becoopen
Hy aenzach gheuouden ts'aerms den brant voorwaer
Zach een Muzeken haest van achter wt loopen
Abandonneerde den brandt, end' hy lieper naer
Heeft ghecreghen, ende zonder ghespaer
Weder-keerende claer,
Int openen vier t'Muzeken hy gheworpen heeft
Zey ondancbaer die, in tijden van weelden openbaer
Bleef my bij, Maer,
In verdriet en ieghenspoet, ghi my begheeft
Hy vijndt veel tafel-vrienden, die in weelden leeft.

Sghelijcx soo langhe alst met eenen wel gaet

In gheluekighen staet vijndt hulp en raedt
En veel vrienden commen hem bystandt bereeden,
Maer als hem Fortune weyghert huer ghelaet
End' hem wederstaet:
Haestelic verloopen zij, ende van hem scheeden.