De warachtighe fabulen der dieren

[p. 62]

[Iongleur, Schemijnckel, en mercatte]

Natuerlicke daedt,

Voor leerijnghe gaet.

Galat. 5. Eccle. 9. en 18.

STaet, ende en wilt wederomme, ziet
Met t'iock der slauernie, ghehouden worden niet
Dat zy gheen ydelheyt en zien af-keert dijn ooghen
Metter dansseresse gheen ghemeenschap biedt
Naer v begheerten te ghaene, en wilt niet pooghen,
Keert v af van uwen wille, want wildy ghedooghen
Dat ghy uwer zielen gheeft haer begheerlickheden
Zoo sal zy v maken (naer twijsemans vertooghen)
Tot blijdtschap uwer vyanden in onvreden.

[p. 63]

Iongleur, Schemijnckel, en mercatte.

EEn Schemijnckel en Meercatte moylick ghepareert
By een Iongleur tot tumelen en danssen gheinstrueert
Waer duere hy al bet, dan den theercost ghecreegh
Zy dansten toer demy toer fraey onghecesseert
Ende wisten op t'houdene als de Muzel zweech
Als t'Schemijnckel stoop, de Meercatte neech,
Al te wackerlick dansten oock bee ouer t'Ey
Spronghen oock den sommersault, ieghens eenen weech
T'welck best gheleert van al was zoo menich zey
End' als de Muzel maecte van alaerme ghescrey
Met Poengiaerden ghijnghen elck anderen te keeren
Maer als de Meester teecken ghaf, elck zyn gheweere af ley:
Dicwils zietmen bet een beeste, dan een mensche leeren.

¶ t'Ghebuerd eens zoo t'Schemijnckel een venue maecte

Een Wijf zadtter, die wt haer schoot noten craecte
Hy keeck, iueckschoerde, zach op zijn Meester zwaer
Emmers ten eynde van zijn consten staecte
Liep naer t'Wijf metten noten, de Meercatte naer,
t'Wijf eylaes, die maecter zeer groot mesbaer
De Meester goyd'int hoopken, met de Muzelstock stijf,
t'Volck traen-ooghde van lachen, zoo zy zaghen daer
Die Beesten om de noten vechten, lijf om lijf
Ia zochten onder de schoot noch van t'aerme wijf
De Meester schooter tusschen, zulck zey doe int vertrecken
Gheen cleederen connen der natueren aerdt bedecken.

Sghelijcx eist ooc metten aermen of metten Rijcken

Die dwaes of zot zijn, nochtans moylic ghecleede
Zijnen aerdt en sal hy niet connen wijcken
Hy laet zijn zotkin wter mauwe kijcken
Oock sietmen an hem blijcken, meer dan by weet.