De warachtighe fabulen der dieren

[p. 58]

[Gheete en den Vvulf]

Tes prijselick en fijn,

Ionghers d'Ouders onderdanich zijn.

Deutro. 21.

ZOo wie een Zone heeft die wederspoorich zy
Naer Vader Moeders gheboden, niet hooren meent,
En onderdanich niet wil zyn: Naer de Wet sal hy
Vanden volcke werden ter doodt ghesteent.

Ephe. 6. a Colls. 3. c Exod. 20 b Deut. 15. b

GHy Kinderen weest gh'oorsaem inden Heere
V Ouders: Want zulcx recht en reden wt gheeft
Eerdt, bemindt, Vader en Moeder zeere
(Dwelck een ghebodt is dat een belofte in heeft)
Op dattet v wel gae, en dat ghy hier langhe leeft.

[p. 59]

Gheete en den Vvulf.

EEn Gheete ghijnck te veldewaerts t'haren ghewinne
Ende het thuus haer ionck Gheetkin teer en cleene
Hem ghebiedende dattet niemandt zou laten inne
Wie datter oock clopte, want zulck was zy van zinne
Datse vaer hadde, alst ionck bleue alleene
En datter niemandt aencoste, dat zou commen in weene
Dus thuus ghesloten hebbende, trackse duere:
En beualt den bewaerder van al int ghemeene,
Goede zoorghe, en rade, houden alle dijnghen in viguere.

¶ De Wulf heeft van verre dese zaecke verstaen

Naer t'huus es rasschelick commen ghegaen
Ende waende als de Gheete zijnen voys vermaecken
Doet opene Ioncxken (sprack gheveyns dlick zaen)
Ick brijnghe wten velde al onse noodtzaecken:
Neen zeyde tGheetkin, ghy moet buten waecken
Want door de veynster-splete, zoo zie ick wel
Dat ghy een snoo Wulf zijt, met verhongherde caecken
My te bedrieghen was v voortstel
Vanden eersten beghinne, maer ick vliede zulck spel
Zouct elders v aes, ghy gheraect hier niet inne,
Yeghelick sal hem bewaren met voordachten zinne.

Bewijsende den Kinderen die onderdanich zijn

Met een blijde aenschijn
Tgoe beuel dat Vader ende Moeder ghebieden
Dat die wijselic en wel doen t'allen termijn,
Maer die haer willeken volghen, die drijncken t'venijn
Daer door zij commen dicwils in groot beswaren,
Wel hemlieden die haers Ouders raedt bewaren.