De warachtighe fabulen der dieren

[p. 56]

[Vanden droncken Hert]

Dronckenschap t'allen lande,

Es zonde schae en schande.

Iere. 35. 3. Regum. 20.

EN wilt v niet drijncken zat of vol wijns
Waer wt volghd een onb'hoorlick wesen
Onder zijn goetheyt licht wat venijns
Zijt sober, in hem te nutten (zoo wy lesen)
Dronckenschap is van God zoo mispresen
Dat hy de dronckaerts zijn rijck ontzeyt,
Wee hem dan die daer zyn hert aen leyt.

[p. 57]

Vanden droncken Hert.

HOort Dronckaerts wat d'exempelbouck belijdt
Vanden Hert die t'zijns Meesters maeltijdt
De Croesen wt dranck
Als de maeltijdt ghedaen was, eens ghedrocken heeft hijt
Dat hy droncke wierdt, ende zoo zijnde verblijdt
Hy hubbelde ende sprangh,
En viel ouer een block, ghestrect ligghende langh:
Door dronckenschap moeste daer zijn been verstuucken
Daer naer wild'hy noyt van t'selfs, noch door bedwangh,
(Dus hem vindende cranck)
Gheen anderen dranck, dan claer water ghebruucken:
Hoort ghulzighe buucken,
Die wijn, bier, by Coppen, schaelen, croesen, en cruucken,
Zoo veel in-neemt, dat v de ooghen wtweenen
Laet v dranck ghetempert zijn in dijn beluucken
Eer ghy drijnckt versmacht, dat ghy breect hals of beenen
Wildy wijs zijn, renunchieert alle Bachus leenen,
Drijnct niet dat d'aders staen ghespannen als pesen
End' hoe v ander Dronckaerdts verachten vercleenen:
Sober zijt, en wilt altijt wakende wesen.

Wee v Dronckaerts vol quader manieren

Die vrouch opstaet om Bachus t' anthieren
End' om te drijncken vrouch, tot tsauendts laete,
Op dat ghy moecht vande wijnen ende stercke bieren
Heet en verwect worden tot oncuusscheghen staete,
In v maeltijden harpen zijn, van cleender baete
Lieren, fleuten, tamboeren, soomen zien can:
In ydelheyt ghebruuct ghijt, gh'eel sonder maete
En des Heeren wercken, die en ziet ghy niet an.