Occasio arrepta. Neglecta

Schema IIII.
Stimulante daemone, miserè eluditur Occasio.

Angelus, Diaboli, Britto, Golphus, Pontanus, Morinus, Oleander.

Ang

SAt ludo probrisque datum est. Occasio vobis
Non simili irritanda modo. Veneramini honore
Quo decet; & gratis admittite munera dextris.
Eia agite; ô tandem resipiscite: Spes super ista est.

1. Diab.

Mirari satis & risum compescere buccis
Non valeo, dum tam noua mundo surgere monstra

[p. 288]

 

Conspicor.

 

2. Diab.

 

En, quàm bellè inuersam dixero sponsam!

 

1. Diab.

 

Digna profectò mihi thalamo quam Pluto iugali

 

Copulet, & festos agat infera turba Hymenaeos.

 

Hanc quoque nunc, iuuenes, certatim inuadite laruam.

 

2. Diab.

 

Arripite inuisam, & saltem sit fabula vobis

 

Tantisper, ludique iocique Occasio, donec

 

Elabatur.

 

1. Diab.

 

Vbi noua fecero gaudia nuptae,

 

Vos paranymphi eritis: Stygiâ regnabitis aulâ.

 

Britto.

 

Golphe, quid hic video? reliquos accerse sodales.

 

Golph.

 

Huc socij, noua nascitur hic Occasio risus.

 

Pont.

 

Prô, monstrum horrendum!

 

Morin.

 

Quid id est?

 

Olean.

 

Num femina? num mas?

 

Golph.

 

Fronte capillitium gerit: ast glabrum occiput olli.

 

Morin.

 

Quid tu autem Pontane putes?

 

Pont.

 

Empusa, vel vna

 

Eumenidûm.

 

Golph.

 

Huc patulas (quiddam mens suggerit) aures.

 

Res equidem multò mihi iucundissima visu

 

Jncidit.

 

Britt.

 

Jlla placent, sed agas.

 

Pont.

 

Quid, Golphe, moraris?

 

Golph.

 

Mos pueris sponsam Maijs ornare calendis,

 

Reginaeque instar longâ deducere pompâ:

 

Et ramis capiti obtensis, fausta omina Nymphae

 

Acclamare nouae. Quid si pro tempore, pro re,

 

Haec eadem nobis ludatur fabula?

 

2. Diab.

 

Bellè.

 

1. Diab.

 

Quandoquidem dat sponte sua se Occasio sponsam.

 

Morin.

 

Consulis egregiè: ô lepidum caput!

 

Golph.

 

Ergo capessat

 

Ramum quisque suum; & laeti Paeana canamus.

[p. 289]

 

Morin.

 

Britto, praei modulos: nos bini ponè sequemur.

 

Britt.

 

Tu potiùs Morine.

 

Morin.

 

Mihi laus magna praeire.

 

Britt.

 

At, quînam incedet? si antrorsum promouet; ecquis

 

Passis antè comis, non censeat ire retrorsum?

 

Golph.

 

Ergo age, retrogrado potiùs pede inambulet: vtque

 

Credatur recto ire gradu, hanc inducite laruam,

 

Pro facie, occipiti.

 

Pont.

 

Tali res consule salua est.

 

Oleand.

 

Spectatvm admissi risvm teneatis amici.

 

1. Diab.

 

Quis vel in ardenti non rideat ista camino?

 

2. Diab.

 

O factum benè! macti animis: sic itvr ad atra.

 

Ang.

 

O stulti in proprium exitium! sic Temporis aurêi

 

Sordescat pretium? tantarum Occasio rerum

 

(O caecas hominum mentes!) satin' apta videtur,

 

Seruiat vt vestris, ceu fabula, lusibus? Eheu!

 

Credite; vos olim facti meminisse pigebit.

 

Tempvs, abi: atque aliò, duce te, se Occasio vortat.

 

Jnuenies alios his fastidite sodales.