Occasio arrepta. Neglecta

Schema III.
Fatui, instinctu Satanae, turpiter tempus terunt.

Diaboli, Golphus, Britto, Pontanus, Morinus, Oleander, Angelus.

1. Diab.

EFfluat in risum Tempvs. Quid rectiùs istam
Aetatem deceat, quàm ludere, quamque iocari?

2. Diab.

Dum ver molle sinit, rapiat sua quemque voluptas.

Golph.

Heus socij; quanti nobis Occasio risus
Obtigit!

Britto.

Egregium iuuenem!

Pont.

Quàm discolor alas
Pluma suo cultu pingit!

Morin.

Liceat precor vnam
Vellere de tantis, illamque aptare galero.

Oleand.

Fas etiam mihi sit, tergo vnam demere pennam.

Golph.

Quantulum id est damni, tantillam insumere partem
Temporis, ad votum? iocus est, non praua voluntas.

Britto.

Sors sua cuique cadat: non hac praestantior vlla.

Golph.

Hui, quae sphaera! Polo subdam caput. En, nouus Atlas.

Morin.

Desine flere; tibi reddetur amice tiara.

[p. 286]

 

Golph.

 

Quantus honos ori atque oculis!

 

Britt.

 

Quae gratia fronti!

 

Unde precor nouus hospes adest? quae patria tales

 

Producit iuuenes, alatos, fronte micantes?

 

Pont.

 

Cernite, praepetibus talaria fulgida pennis.

 

Morin.

 

Si plantisque humerisque mihi Deus adderet alas;

 

Semper ego ante omnes vellem contingere metam.

 

Quando fatigarer cursu, per aperta volarem.

 

Britt.

 

Incipe, care, seca volucri liquidum aëra plantâ;

 

Et supra capita alta vola: mox inde reuerte.

 

Nos quoque consutis tentabimus ardua flabris.

 

Morin.

 

Me potiùs subuectum humeris in sidera tolle.

 

Oleand.

 

Ast ego subsiliens equitabo in arundine longa.

 

Golph.

 

Rostrum habet aeratum; ne mordeat ergo caueto.

 

Britto.

 

Redde puer falcem: non est ea lusibus apta.

 

Pont.

 

Vitrea quid sibi vult geminata cucurbita? Papae!

 

Cedo precor: tremulâ hinc bullas educere lymphâ,

 

Et calamo difflare leues sublime per auras,

 

Jucundum pueris.

 

Golph.

 

Si me donaueris istis;

 

Fulua domi latitat matre ignorante columba;

 

Hanc (quamuis magno steterit mihi) munus habebis.

 

Britto.

 

Nec donat, neque dona negat: vi tollere, iniquum.

 

Attamen ingeniosa mihi se pandit ad ista

 

Dona via: in nostros venient haec obuia casses.

 

Golph.

 

Quae via, quae ratio?

 

Brit.

 

Dicam, vos ora tenete.

 

Sunt ludi nobis varij; latrunculus, orbes,

 

Alea, cum chartis, discus, pila, quadra, trochusque,

 

Sunt choreae, et saltus, cursus, et lucta palaestrae.

 

His ego certamen ponam, iuuenemque lacessam

 

Mille modis, nil vt timeat deponere mecum

[p. 287]

 

Haec quaecumque gerit. liceat sic fallere Tempvs.

 

Oleand.

 

O benè consultum! Sic Tempvs abibit inane.

 

1. Diab.

 

Sic decet, & fas est: sic praesens exigit aetas.

 

2. Diab.

 

Seria sint senibus, pueris ioca & otia curae.

 

Omnis enim teneris ludit natura sub annis.

 

1. Diab.

 

Sic fruticant frutices, vituli vitulantur in herbis:

 

Subsultant agni, luctantur cornibus hoedi.

 

Sic catuli, et parui miscent iocularia catti.

 

Aequum est & pueros aeuo meliore fruisci.

 

Ang.

 

O stultus iuuenum mentes, ô ludicra semper

 

Jngenia in magnis, neglecto Tempore, rebus!

 

Síccine ludibrio decuit triuisse proteruo,

 

Quod vobis nimium larga indulgentia caeli

 

Ad Sophiam & veros donauit Tempvs honores?