Disputatie over den catechismus van Heydelbergh, openbaerlijck voor den volcke gehouden op't Hof van 'sGraven-Haghe in Hollandt, anno 1583

Copie.

Vermoghende, hoochgeleerde, groot-achtbare ende voorsienighe Heeren.

V E. is kondt, hoe dat u E. mitsgaders d'andere Heeren Ghecommitteerden op't beleedt vande aengeheven Disputatie, alhier in den Haghe opten eersten Decembris 1583. door veranderinghe daer inne ghevallen, was besloten, dat ick, oock mijne partyens ouden vertrecken, midts dat ick voor den elfden der selver maent soude over senden in gheschrifte 'tgheen ick wilde segghen op't schrijven der Predicanten laetst inne ghebracht. Ten eynde 'tselve mijn gheschrifte terstont behandet soude worden den Predicanten, omme by den selven beantwoort, aen u E. over ghesonden ende na beschrijvinghe van partyen, 'tselve met oock mijn gheschrifte den Volcke voorghelesen te worden, etc. Volghens 'twelcke ick mijn gheschrifte den achtsten Decembris overghesonden hebbe gehadt aen u E.E. Na dien ick nu niet en mocht vermoeden soo hooghwichtigen handel begonnen te zijn gheweest, omme also opten drempel, te weten, op't eerste van vijftigh of sestigh articulen te laten steecken, ende ick wel merckte dat de selve soo haest niet af-lopen en soude, oock dat my ongheleghen ware, alsoo daghelijckx tot mijnen grooten costen ende moeyten tusschen den Haghe ende Haerlem te slingheren, hebbe ick mijne huysinghe tot Haerlem verhuyrt, hier inden Haghe een huys ghehuyrt, ende my voor Mey lestleden met mijne krancke Huysvrouwe, die gaen noch staen en can, ghevoeght metter woone alhier inden Haghe, denckende dat de Predicanten ten lesten noch eens heur schrift inne brenghen, ende den handel daerse was ghelaten weder aenheven souden.

Maer want ick hier nu al ruym ses weecken ghewoont hebbende, na dat mijn voorgheroerde schrift wel neghenthien weecken over ghesonden was gheweest, niet altoos en verneme, oock niet ontboden en worde, ben ick in bedencken ghekomen van den voortgangh deses begonnen handels, die nu al wat traeghlijcker dan inden beginne wert ghevordert.

Ende alsoo mijn Huysvrouwe, niet allene na den Lichame, maer oock na hare sinnekens soo swack zijnde, dat ick my verbonden houde haer (daer ick mach) te ghelieven, my onophoudelijck quellende is, om weder tot Haerlem te gaen woonen, alwaer ick oock versuyme eerlijck ghewinne tot mijne huyshoudinghe nootlijck zijnde.

Soo ben ick (siende desen handel niet ghevordert te worden) in voornemen ghekomen om mijne krancke Huysvrouwe te ghelieven, mijn huys-oorbaer te vorderen, ende weder tot Haerlem te gaen woonen.

[fol. cccclviiiv]

Bereyt omme weder alhier tot volvoeringe vanden begonnen handel in behoorlijcke ordre gheredresseert zijnde, te verschijnen, t'allen tijden als ick daer toe weder beschreven sal zijn, tot kosten, niet van my, maer van die my sullen doen beschrijven, so ick expresselijck midtsdesen my aenbiede, ende versoecke datmen my nu weder behande het voorsz. mijne overghesonden gheschrifte (daer van ick gheen minute en hebbe) alsoo't selve niet en is gheschreven voor den Predicanten, alleen, midts dat ick beschreven zijnde, 'tselve, soo't daer leyt, wederomme inne brenghen, ende voor den Volcke lesen wil.

Vermoghende, hoogh-gheleerde, grootachtbare ende voorsienighe Heeren, zijt den Almoghenden bevolen, gheschreven in den Haghe den achthienden Iunij, 1584. By. Onderstont u E.E. dienstwillige ende onderdanighe, ende was gheteeckent Dirck Volckertsz. Coornherts. Opschrift was E. vermoghende, hoochgheleerde, hoochachtbare ende Voorsienighe Heeren vanden Hogen Rade in Hollandt, Zeelant, ende Vrieslandt, als Hooftghecommitteerden van den aengheheven Disputatie inden Haghe.

Ick ondergheschreven hebbe dese Copie met den originalen Brief ghelevert in handen vanden Secretaris Waghewijns, present den Griffier Geniets, wesende beyde inde Griffe vanden Hooghen Raedt, datum den neghenthienden Iunij smorghens, Anno 1584.

Na de middagh ben ick wederomme gekomen om antwoort op den principalen brief te hebben, comende voor de Camer vanden Hooghen Raedt, vraeghde ick den Deurwaerder na den voornoemden Waghewijns, dewelcke my inde Camer dede comen, daer oock present was den voornoemden Geniets, welcke Geniets my de Copie met zijn originalen weder in mijnen handen ghegheven heeft, gaf my ter antwoort, dat mijn Heeren de selve ghelesen hadden, maer dat mijn Heeren daer toe niet ghecommitteert en waren, of haer lieden commissie sulcx niet en hielt te doen, volghende Coornherts begeerten, overmidts daer maer ettelijcke van mijn Heeren over gheweest zijn, want na der hant mijn Heer den President Wenschen, ende noch andere eerst inden Hooghen Raet ghekomen zijn: Ende oock mede om datter over gheweest zijn sommighe Heeren uyten Raet Provinciael, desghelijcx mede ettelijcke vande Staten ende ghedeputeerde vande Steden, ende dat Coornhert 'tselve moet versoecken aen zijn Excell. ende aen de Staten, die mijn Heeren van den Rade daer toe ghecommitteert hadden, sulcx zijn Excell. ende Staten ordonneren, hem dan daer na ghelieft te reguleren.

I. Evertsz. ter Voort.

[fol. cccclixr]

Ick ondergheschreven attestere ende verclare by desen ten versoecke van Dirck Volckertsz. Coornhert, dat ick t'synen versoecke den principalen Brief teghens dese Copie gecollationeert wesende ende daer mede accorderende, op gisteren als den vyfden Iuly 1584. ghepresenteert hebbe Iohan Wagewijns, Substituyt vanden Griffier vanden Hoogen Rade in Hollandt, omme den selven brief den voornoemden Rade te behandigen ende andtwoort daer op te hebben, welcken Waghewijns ten voorschreven daghe na den dryen uren na den middagh, voor de Camere ende int ingaen vanden voornoemden Rade sulcx van my verstaen hebbende, heeft den selven gerefuseert ende gheweygert van my te ontfanghen, segghende den voornoemden brief in voorleden daghen hem noch eens ghepresenteert geweest te zijn, dan daer mede niet te doen te willen hebben. Des t'oirconde mijne gewoonlijcke ende dagelijcksche Signatuyre Notariael hier onder ghestelt den vijfden Iulij, 1584.

G.I. Rijswijck Notaris subsignavit.