Het gheestelyck opeeltjen van Hardoysche roose-bladers

Die de Werelt wilt laeten, De Werelt sal hem haeten.

Stemme: Trompet Marin. (ofte) Waer zijn u al de silver baeren. (ofte) Waer is nu de macht van Spaignen.

Segt my jonck hert waer wildy gaen loopen
En lust u hier van mijn Cramerye niet?
Mijn huys is open komt wildy koopen,
Vraeght naer al t’gene dat ghy niet en siet?
Ick ben de werelt, met lusten ghepeerelt?
Ick sal u toonen vreught sonder verdriet.

2. Neen ghy komt werelt al vele te laete,

Mijn gelt moet dienen voor weerdiger goet:
’t Zijn de rijckdommen die ick meest haete,
Verdriet en lijden aen my dienen moet?
Tot Clooster-leven wil my gaen begheven,
En stooten al s’werelts vreught met den voet.

3. O teer jonck hert ghy sult het beklagen,

Den vryen-will’ soo vele is weert,
Gheen schoone kleeren en suldy draeghen,
Ghy moet daer derven ’t gen’ u herte begeert;
Die disciplinen die sullen u pijnen,
Keert eer het lijden u krachten verteert.

4. Soo ick al d’ydelheyt wil verwinnen,

Ick bidde u Heere sterckt mijnen moedt:
Van daegh’ ick offere u alle mijn sinnen,
Ick offer u Heere mijn vleesch en bloedt,

[p. 27]

 

In druck en lijden sal min hert verblijden,

 

Want licht verkeert den wil ’t suer in het soet.