Klagende maeghden en raet voor de selve
(1634)–Jacob Cats–
Auteursrechtvrij
[pagina 170]
| |
En alsmen vorder is ghetreden,
Soo dient sijn lof oock daer vermelt.
Die aen syn paert laet haver geven,
En bidt den Heer wanneer hy reyst,
Is daerom noyt te rugh ghebleven,
Schoon dat het beyde tijt vereyst.
Wenst ghy dan spoet tot uwe saken,
Siet ghy op voordeel, of ghewin,
Wilt God eerst met den geest ghenaken;
Dat is in als een goet begin.
Wel, vrienden, wy syn uytgetogen,
En yder weet syn eyghen gangh,
Koom laet ons, naer ons kranck vermogen,
Den Heere groeten door ghesangh.
O die in uwen throon geseten
Met geene plaets en sijt bepaelt,
| |
[pagina 171]
| |
En kont ons doen en poogen weten
Hoe ven'ons lijf of herte dwaelt.
Wilt ons met dynen geest geleyden,
In al dat is, of sal gheschien.
Wilt onse saken soo bereyden,
Dat wy oock daer u liefde sien.
Hoe liet ghy eens u gunste smaken,
Doen ghy waert leyder van u volck!
Des nachts waert ghy een vyerigh baken,
En op den dagh een helle wolck.
En als de Wijse quamen talen
Of God de Soon was in het vleys,
Een sterre met haer gulde stralen,
Die was haer leyts-man op de reys.
V kracht is heden niet vermindert,
V hant is heden niet verkort,
| |
[pagina 172]
| |
Geef, Heer, dat ons geen quaet en hindert.
Maer op ons doen u segen stort.
Geeft dat wy spoedig weder keeren,
Door uwe geest en gunst verblijt;
Soo sullen wy dijn naem vereeren,
Den ganschen loop van onsen tijt.
|
|