licht en sal teghen-strevelen, maer liever soecken met wijcken ende ghehoorsamen sijn herte te winnen, ende teenemael tot haer te verbinden.
De ervarentheyt leert dat veeltijts de beginselen, selfs vande allersoetste dingen, so eenige moeyelijckheyt in haer hebben, twelck is ghelijck eene suericheyt die metter tijt in soeticheyt verandert. Wat isser doch soeter ende aengenamer als wijn, die nochtans kompt vande eerst-suere druyve? Daerom die gene die soo lichtelick soecken uyt den bant des houwelijcx te springen, ende de jonge vrouwe te laten sitten, om datse quansuys eenige hare suericheyt of stuericheyt niet en connen verdragen, die doen even soo dwaselijck als die gene, die, hun stootende aenden eersten sueren smaeck der onryper druyve, deselve heel versmaden ende verworpen, latende ondertusschen andere ghenieten de soeticheyt der selver naer datse rijp gheworden is. Ghy die wel kont patientie nemen metten nieuwen wijn, tot dat hy metter tijt claer worde, ende sijne wrangheyt in mollicheyt verandere; wacht toch oock een weynich tijts tot dat de nieuwgetrouwde hare rypicheyt ende soeticheyt vercrijge. Het is doch soo den aert aller menschelijcker dingen, door Godes beschickinghe, datter in dese weerelt niet soo soet en sy, of ten is met wat bitters vermengt. Soo ist oock mette jongelingen die door de cleyne ervarentheyt noch lutter gesteltenis in hun hebben: daer is so wat stuers ende selsaems in hun, t'welck mette jaren allenxen versacht ende beter gestelt wort. Van ghelijcken de nieuw-getrouwde jonghe vrouwen, die om een kleyne sake ghestoort zijnde, stracx vyantschap innemen ende vande mans wech loopen, zijn even soo qualijck beraden als die gene die eens vande byen ghe-
Auteursrechtvrij
