De const van rhetoriken

[Theoriestrofen 223-227]

☞De Const.☜

¶ De voorgaende baladen moet ic duerwroeten,
Om tsaerbeits verzoeten, nopende dintricaet:
Sylleben, daer in myn propoost, heetick voeten,
Den derden ende lesten zuldy bobbelen moeten,
Met meer andere, eer ghy verstand ontfaet.
Nopende tSchaeckberd dat vueren staet,
Vvild ghy tsghelijcks maken om dijns zins verlichten
Beghind an tcruce eerst dats minen raet:
Vvant daer af dependéren alle dander dichten.

¶ De reste vanden zeluen hulien orborelic,
Es al notorelic, als ghemeenen coop.
Rammel tsammele heetick dicht vercorelic,
Alsmen Rethorike zoo es versmorelic,
Dat zu schijnd rammelende al ouer hoop.
Simpletten, zijn als een dicht maeckt al den cnoop.
Dobbletten als ghijt wild met twee vervullen.
Epitaphien nemen ouer doode haren loop.
Simple Buesel dicht heedt men Cocorullen.

[p. 242]

225.

 

¶ Dander es al claer, vuer wiene dat zij

 

Vvy wisent vuer by, als een simple pleit.

 

Vele ander zaken mochtick ontdecken dy

 

Daer dijn rethorike met saudt verchieren ghy.

 

Ende tware noodsakelick hier gheseit:

 

Ghelijc van vele dijnghen de proprieteit,

 

Schoon Termen, Poëtrie, zomighe vocabelen,

 

By exemplen worde dat hier goed ouerleit

 

Mids het nopen int curte van eenighe fabelen.

¶ Maer den tijd niet bliuende in eenen viguere
Loopt altoos duere, alzoot blijct by desen.
Minen bouc werd dicke vanden labuere
Dies moet ickt curten, ic en hebbe gheen kuere,
Of zij soen my vloucken die ditte lesen:
Aldus ghy voernoemde ionghers ghepresen,
Mannachtich, robust, niet teer als crancke lemen,
Ick biddu alle tsamen in dient mach wesen,
Vvild desen minen aerbeid in dancke nemen.

¶ Ick hebbe u verclaerst om tsgheests verfieren
Diueersche mannieren, Exemplen, en Sneden,
Vvild ghy uwen zin voorder emploeihieren,
Ende ghy droomen wild blocquieren,
Int beghin mijns boucskins vindt ghy de vulle leden.
Met noch een Sermoen zuldy zijn te vreden,
Zoo hebt ghy vulcommelick al mijn propoost:
Vut tgheent dat hier staet op den dagh van heden
Zuldijt al contrefaicten in dien ghyer op gloost.