De const van rhetoriken

[Theoriestrofe 219; Ricqueracque; theoriestrofe 220]

¶ Vvat Ricqueracque es metter Baguenauwen,
Vvilwy nu anschauwen, ende exponeren:
Vuer een Tsaeckdicht willicse hauwen,
Vvy vlamijnghen zullense laten verflauwen,
Maer, willen haer qualiteit specifieren.
Een ricqueracque om trechte resolueren,
Zoo dwalsche zeit, es een dicht recht tusschen tween goet:
Maer gheenen zin en can zu concluderen,
Zoo hier volghd, waer by elc daer af scheen moet.

¶ Ricqueracque.

¶ Packebier es van veel schulden gheruumd,
Ende heeft hem ghedroncken al buten neste.
Te wilen Roel pattijn den hane heeft ghepluumd,
Heeft het vuul Cockskin den pot gheschuumd:
Ende Claeis vander sticchele liep duer de veste.

[p. 229]

 

Marolle dede om volghen haer beste:

 

Laboris de crieckere was den pipere,

 

En te wilen schooyde de bruud naer Ipere.

¶ Der Baguenauwen moet ghi ooc doen swichtinghe:
Vvant tes een ontstichtinghe, zonder pac of band.
Zonder dicht of redenen, ende gheen verlichtinghe,
Ghelijcmen veel liedekins, en zulcke dichtijnghe
Op zijn boersche maeckt, int stede ende op dland.
Als useren veel Hautin facteurs zonder verstand
Ditte, en wanen zoo met de ghedeputeerde waken,
Ghy en mueghes niet volghen an eeneghen cand:
Vvant het zijn alle ghereprobeerde zaken.