De const van rhetoriken

[p. 67]

[Balladen van 7-en; theoriestrofen 185-187]

¶ Baladen van zeuenen. ¶ Banckdicht.

¶ Vut ionsten moet ic u een vulle glas schijncken

Ende dan willet ute, naer uwen pas drijncken

Haer ter eeren, dien ghy moedt u beuel hélen.

Laetse met u neder ind groene gras zijncken,

Of wildse bouen, by u, op den tas wijncken:

Doet venus harnas clijnken, tmocht iement el stelen

Ende wild met haer der minnen spel spelen.

¶ Ander snede van zeuenen. ¶ Charte.

¶ Zouct nu nieu concepten verscerpt u verstanden
Ghy die ons keysers landen met herten bemind:
Slaet opwaert u ooghen, leghd te gare u handen,
Ghebenedijt ende loefd Marien kind:
Twee machtichste der vveereld zyn zoo ghesind
Dat tusschen hemlien God paeis te deser spacie sloot,
Ende al by tshelichs gheests inspiratie groot.

¶ Ons edel Keyser Carolus noit iemends ghelijcke,
Quintus ind Imperie, elck weet dat naeckt,
Ende den edelen Cuenijngh vanden vrancsche rijcke
Hebben wy vvillecuere nu paeis ghemaeckt:
Dits den dagh daer elck naer heeft ghehaect
Dies moet hem elc pooghen tot vrueghd te spoene:
Goede vrueghd es altoos in seisoene.

Hoord vvies heere ende vvet sijn ordonerende:

[p. 68]

 

Vvie in woensdaghe de schoonste dyalogue sal lezen

 

Tusschen tween en drien, den paeys recommanderende,

 

Dien extollerende vuer al best ghepresen,

 

Sesse cannen wijns werden hem toe ghewesen

 

Daer naer viere, dan twee, op die zelue huere,

 

Maer furnierd rethorike met schriftuere.

¶ Noch breeder moet elc tverstand ghehijnghen al
Tsnauonts ten seuenen werdt druck ghebannen:
Vvie dalder beste nieuwe lied sijnghen sal
Angaende desen paeys tsy vrauwen of mannen,
Vuer hoofd prijs werden hem gheschoncken zes cannen,
Vuer tweesten prijs 4.2. salmer, en drie schijncken
Dichtt vroyelic en laedt de harmonie clijncken.

¶ Ten derden moeten wy ooc publieren
Zulck als mijn heeren Schepenen doen verstaen:
Vvie woensdaghe tsnauonts alder schoonst sal vieren,
Cierlickst, minst ghesien, naer daud vermaen
Sal xij. cannen wijns vuer hoofd prijs ontfaen,
Thiene, achte, sesse, viere, en twee ten lesten:
Gode ter eeren keerd alle dijnghen ten besten.

¶ Vanden vieraers, wie tsanderdaeghs ten drien
Sinen prijs zal halen coraiues mignoot,
Schoonst boerdelickst ende minst ghesien
En sal ooc van prijs niet vallen bloot:

[p. 69]

 

Neemd mans, vrauwen, maeghden in u conroot,

 

Vvild u triumphantelick van goeden belee maken,

 

Hu sullen sesse cannen wijns, viere, en twee naken.

¶ Den xj. deser maend, laedt u niet veruelen,
Naer noene sal elck ter maerck commen moghen:
Men salder een spel van zinne spelen
Sortérende op den Goddelicken paeys vuer oghen,
Vvie tsnauonts esbatement sal vertoghen
Boerdelicst, minst ghehoord, om elcks veriolisen,
Sesse, viere, en twee cannen werden de prisen.

¶ Hoort wien men roupt duer den paeys vul minnen,
Eerst de Paxvobianen ende Kerssauwieren,
De bloeiende iueghd, voord van buten en binnen
Straten en wijcken, mueghen hem haerwaerd stieren,
Gheselscappen en zullen hier niet failgieren,
Maer blidelick by commen in eeren in dueghden,
Vvant paeys es den oorsprongh van allen vrueghden.

¶ In woensdaghe ten viij. om tsvruechds vervullen
Comt loten, brijnghd blasoen, naer weerc laedt copie
Ter plaetsen die wy u ordoneren sullen:
Trommeld stijf om breken elcks fantasie.
Volghd tcours der consten schuud schimp vilonie
Ende niemend en behelpe hem met adpeele
Vvant wy reseruérent ten tenneele.

1544.

[p. 70]

185.

 

¶ Hier behoord ghy ionghers wel te wakene,

 

Zonder te tsakene, in dijn prolatie,

 

Pooghd u dees charten alzoo te makene,

 

Artikelen en poincten zo wel te gherakene,

 

Datter faute nieuërs en crighe statie:

 

Huere, plaetse, prisen, naer de imaginatie

 

Van den voordstelder noept met blyder kele:

 

Van als doet alzulcke specificatie

 

Datter en ghebreke noch en zy te vele.

¶ Ten anderen ouerdijnckt in mijn labueren,
Ghy en zijd doctueren noch meesters ghenaemd,
Dies brijnghic u simpel dichten vueren
Om dat ghy dy zeluen niet en zoudt becueren,
Vvant iongh ingien es vullick beschaemd:
Ick doe zoo mijn concept van vueren betaemd,
Eerst willick u lien simpelic onderwysen:
Ghelijck een meessenierken simpelic craemd
Moeten leerlinghen pap hebben teender spisen.

¶ Gheen meesters en leeric, maer hulien uut minnen
Die simpelick moedt beghinnen an zom of deen hilt,
Zo en zuld ghy niet trauilgieren u zinnen,
Den aerbeid en sal u niet haest verwinnen,
Daer ghy niet toe en cuent bliues ghestilt:
Hy es zot die bouen zijn macht iet wilt,
Ghy moedt eest simpel om tsins versachten leeren,
Te wilen ghy dus doet of dadt lettel schilt
Vvillick my totten baladen van achten keeren.