Mosalect. Bloemlezing uit de Limburgse dialectliteratuur



[pagina 258]
Tankeldraot Ransdaals Dizze mörge, aan de wesjlien, Wieste effe sjprooks mit mich, Zoog ich nog väöl miè wie angej, Leefste kind, m'n sjpas aan dich! In 't versjote ruelich bluuske,* Op dien klumpkes, flot en vrie, Mit die witte-wietsje* mangel* Waosjte toch zoè sjoèn, Marie! Mit dien sjlanke, blanke ermkes, En dien flinke, flotte heng, Mit dien ièwig lachemundje En d'n hagelwitte teng; Mit dien frissje roèzeluppe En dien kroen van donkel haor, Mit dien ummer vruntlich waeze, En dien sjtum, zoè blie en klaor! Neet i sjoèn en sjtaatse kleijer, Neet op fiès of danspertie, Neet i vreuger, baeter tieje, Geveelste mich wie huj, Marie! Doe aa geen zie, ich aan dees zie... Tössje os der tankeldraod.* ...Is da vuer daodoèr te komme Noe vuer mich gaar geine raod? H.A. Eussen