Mosalect. Bloemlezing uit de Limburgse dialectliteratuur

[p. 259]

Et Maike
Ransdaals

Et Maike waor ei maetje
Va noètref* twintig jaor,
Mit rueskes op de wange
En krölkes in et haor.
't Waor ummer sjiek en deftig,
Versjtong'n hawf woèrt frans,
Et droog de lètste moède
En kant der nujtsten dans.

Et giechelde-n-en lonkde
Der ganse langen daag,
Nao alles wat mer langs gong
En deej haos geine sjlaag.
Et sjpièlde mit de jonge,
Gong gaer mit einen oet,
Meh kalde hae va leefde...
Da lachde-n-et em oet!

Et Maike woèrt get awer.
Et waor noe gans verwènt:
Kos-ter waal hondert kriege
En waor toch noèts kontent.
Meh wol ins eine sjpraeke
Va wiets ein inkel woèt
Va vrieje-n-of van trouwe,
Dae woèrt neet aagehoèrt.

[p. 260]

 

Zoè gong al mennig jäörke

 

Mit gekkigheit vuerbie.

 

Noe droog et Maike bluuskes

 

Van d'alderbontste zie;

 

Zoè trok et noch de aandach

 

Op fièskes en op bal:

 

Meh eedrei zag: ‘Mit 't Maike

 

Is 't 'n houpeloès geval!’

 

 

 

De ièsjte rumple kaome

 

En kerfde zie gezich.

 

Et Maike woèrt bedaarder

 

En sjwoèrder va gewich;

 

Pös op 'ne gowe mörge

 

Et zuchde: is 't da waor?

 

Want in z'n vingre heel et

 

Werechtig... ei gries haor!

 

 

 

Doe gong et zich bedinke.

 

't Waor haos aan 't ing van 't leet.

 

Wat mos et gao beginne?

 

Allein... dat gong toch neet!

 

Waor noe nog mer ins eine,

 

Mer einen inkle dao,

 

Dae kalle wol van trouwe:

 

Da zach et hièl gaw jao!

 

 

 

H.A. Eussen