Mosalect. Bloemlezing uit de Limburgse dialectliteratuur



[pagina 116]
Verwiet tösse naoberse en moag Maastrichts Naoberse: Bistoe weer dao, posteur,* Doe tieretejje slòdder,* Kums veur mien kelderdeur Mèt tiene voule modder? Kom nog ins, boere prop, Vlaak veur mien vinster keere, Iech slaon diech oppe kop En zal dien trèkmöts smeere! Maog: Wee hètstoe boere prop? Doe bis, verdöld, bagaazje! Begin, en slaag mer op! Höbstoe ins tie koeraazje, Dan krijg tien kakedoe Ouch fris get op zien oere. Doe lielike Baboe; Doe kins vrij nog gein boere!
[pagina 117]
Naoberse: Doe asterante tes!* Iech zal diech goon aonklaoge, Want tat deistiech espres, Allein um miech te plaoge. Is alles sjoen gesjròb En den drek opgelaoje, Dan kumste miene stòp Mèt sliek en strònt begaoje! Maog: En wat beeldstoe diech in? Bliksem, zouwste neet zwere 'n Prinses of ein Graovin, Die väöl heet te vertere! En wat höbst' al gehad? Die vaar dee waos van boete, Die moor kaom nao de stad Mèt kukes en mèt sjroete! Naoberse: 't Raak tiech neet, liel'k geziech, Doe stijve boerepommel! Wat iech höb, das van miech, Doe asteranten drommel! Boeveur kumstoe nao Treeg, Es veur dien pans te völle? Aon hoes vraotst' anders neet Es kies en roggeknölle!* L.P. Delruelle