Mosalect. Bloemlezing uit de Limburgse dialectliteratuur

[p. 23]

Haawt g'r ooch zoe vaan Eesjde...
Eijsdens

Haawt g'r ooch zoe vaan Eesjde es de ‘légiponts’ riepe?
es op d'n aswaeëg de kesjtaoënzjele liege geziejd?
es de keu ien de wejje sjteurm sjtoete aon de sjtiepe
en de veiling op volle toere driejt?

Lopt g'r ooch zoe gan* langs dij aw boerderije?
doer dij sjoen wiette sjträötsjes aone kaant vaan de Maos?
haawt g'r ooch vaan de sjtaegskes oe de kuppelkes vrije?
en vaan 't kesjtiel mit (ochèrrem) z'n versjendeleerde naos?

Haawt g'r ooch zoe vaan 't Eesjders dat g'r koelek zouwt valle
vaan gepakheed es g'r tiks ien der vraemde op rejs,
'n oongbekinde moongd ienens huurde kalle
vaan sjnoeffelsplak, haoëmzeek* of klaeëvermejs*

Sjoen bies te, mien Eesjde en gaar geene kwieëzel,
aal helste diech mer sjtel ien d'n heukske apaoërt,
op de geziech dat ziech sjpiegelt ien waoëter en kiezel,
sjpäölt 't griemelke* vaan d'ne zonnigen aoërd.

De prebeers neet 't hart vaan de vraemde te winne,
wie e rusjtig kingd zietste mer aon d'ne moer,
väöl loope t'rs langs tiech omdat ze diech neet kinne,
aeëvels: 't sjoenste blumke bleujt dik ien de loer.*

Nee, iech kin gaar neet genog vaan diech kriege
en of iech hie loop of dao, dat is miech krek prej,*
Eesjde, de bies miech leef, nee, iech kin 't neet zjwiege,
vanaon 't Bat pos op de Misjerhej!

Jeanne Theunissen