Mosalect. Bloemlezing uit de Limburgse dialectliteratuur

[p. 22]

D'n awwe Breusjter* toeën
Eijsdens

Iech gaon 'ns zoe gèère aon den tiene sjtoeën,
Sjoenen, awwen toeën,
Daan loor iech langs d'n ribbe-n-op
Nao 't haönsje op d'ne sjpietse kop
En daan dink iech dèk - geluifste miech? -
Iech zow wèlle zien, 'nen toeën, wies tiech!

Den veuj zien begaojd oongderum aon-e-groond
Doer sjtöb en pratsj en... mennigen hoongd.
En op 't undersjte sjtök vaan de mergellief
Hèèt eedere koejong al 'ns oet tiedverdrief
Mèt naoëgel of kniep z' ne naom gekretst,
Of 't doorsjoeëte hart vaan zie mèètske gesjetst.

Mèh boeëve dat gekriebbel op d'ne boek
Dao sjpuuële* de uile mèt de blaoëjermuis* koek*
Ien de duusjterste heuk vaan d'n ribbekas.
En d'n vinjsjterkes loore mèt riechtige sjpas
- ömdat ze elleng mer 't sjoene zien -
Vaan boeëve-n-aof de wij wèèreld ien!

Sjlaank sjtèèt d'ne sjpiets op de sjtevig lief,
Hoeg boeëve den drek en 't koejonge-gesjrief!
Alleng get doeve zjwejjere roongd d'ne kop
En vèlt al 'ns get mès, och de zon druugt 't op.
Op 't tiepke dreugste vol gloeërie de kruus,
Zoe hoeg dast' 't baw d'n hiemel ien sjtuus.

Iech gaon 'ns zoe gèère aon d'n tiene sjtoeën,
Awwe sjlaanken toeën.
De sjtèès dao kieëtsrech ien wèèr en winjd.
En de bies vuur oos onnuttigheed blinjd.
...Iech zow wèlle zien:... 'nen toeën, wies tiech,
M'n veuj oppe groond en bie Slivvenhier mie geziech!

Jeanne Theunissen