|
| |
[Twee Jonghe Gasten...]
Twee Jonghe Gasten Logeerende by eenen Weerdt, eenen der selver ginck by de Dochter, ende het Wijf door ongheval by
den anderen slapen, de gheene die by de Dochter gheleghen hadde ginck daer nae
by den Weerdt onder, ende heeft hem het heele stuck verteldt, meynende sulcks
aen sijnen maet te segghen: Waer uyt sy kijvende werden, dan de Moeder bedacht
haer, ende is in haers Dochters Bedde gaen ligghen, ende daer heeft zijt met
seecker woorden weder te recht ghebrocht. Om te bewijsen datmen een faute door vergrijpinghe ghedaen, met bedachten raede behoordt te decken.
IN de pleyne van Mugnan by Florencien, is onlancx een goet Man
gheweest, die voor alle gaende ende comende herberge hiel om gheldt, ende al
wast soo dat hy arm van persoon was, ende maer een kleyn huysken en hadde, soo
nam hy noch wel overnacht uyt grooten noodt niet eenen yeghelijcken, maer
yemant van zijn kennisse in, dese selve hadde een Wijff tamelijcken schoon, van
de welcke hy twee kinderen hadde, d'een was schoon Jonge beleefde Dochter van
ontrent vijfthien oft sestien jaren out, die noch ongehout was, d'ander een
cleyn knechtken dat noch over | |
| |
een Jaer aende Borsten ghelegen
hadde. Op dese Dochter is een Jonck ende deuchdelijck Edelman van onse
Stadt seer verlieft gheworden, die dickwils door desen wech trock, ende aldaer
verkeerde, ende sy die haer wel fier hiel, van eenen sulcken persoon ghevrijdt
te werden, is daer-en-tusschen datse vast haer beste dede om hem met
lieffelijcke trecxkens in haer vrientschap te houden, insghelijcks op hem
verlieft gheworden, ende menichmaels soude dese liefde, tot ghenoeghen der
partyen beyde, int werck ghecomen hebben, soo dese Jonghman (die Pinuccio
ghenoemdt was) sijn ende des Dochters eere niet ontsien en hadde, nochtans den
Brandt van daghe tot daghe toenemende, Is Pinuccio inden sin ghecomen dese
Dochter te willen ghenieten, ende hem is inghevallen middel te willen vinden
van daer op eenen nacht te comen logeeren, denckende als eener die de
gheleghentheydt vant Huys wel wiste, dat hy dit doende, mettte Dochter soude te
Bedde comen te gheraecken, sonder dattet yemandt soude ghewaer worden. Ende
even alsoot hem inghevallen was, heeft hy 't sonder langher daer op te droomen,
int werck ghestelt. Hy heeft dan met eenen zijnen ghetrouwen mede-gheselle,
Adriaen gheheeten, twee huer-peerden ghenomen, ende daer op twee malen gheleyt
hebbende moghelijck vol stroys, uyt Florencien ghereden, ende eenen grooten
keer ghenomen hebbende, zijnse ten lesten alst alree nacht was, op de pleyne
van Mugnon ghecomen, ende aldaer als oft sy uyt Romanien ghecomen waren,
hebbense haeren wech nae dit Herberghsken toeghekeert, daerse aende deure van
desen goeden Man clopten, dewelcke als eener die met eenen yeghelijcken seer
familiaer was, stracx de deure gheopent heeft, en Pinuccio heeft hem gheseyt:
goede Man siet ghy moet ons desen nacht Herberghen, wy meynden binnen Florencen
te raecken, dan wy en hebbent soc niet connen maecken, dat wy voor dese ure hier hebben connen comen, wien den Weert
gheantwoort heeft, ghy weet wel Pinuccio hoe dat ick qualijck versien ben om
sulcke personagien te Logeeren als ghy zijt: Niettemin naedemael dat u den
nacht hier overvallen heeft, ende ghy niet en weet waer elders gaen, sal ick u
gheerne herbergen ten besten dat ick can. Als sy dan de Peerden afgheseten ende
in dit kleyn Huysken ghetreden waeren, hebbense eerst voor al hun peerden
ghestalt, ende daer na wel te eten mede gebracht hebbende, dedense den weert
met haer eten; Nu wast so dat de Weert niet meer als een heel cleyn
Camerken en hadde, in het welcke drie Beddestedens stonden, ten besten
ghevoecht als de Weert gheconnen hadde, Te weten, twee tegens den eenen muer,
ende een ander vande ander zijde recht teghen over de selve, noch wasser so
cleynen ruymte tusschen beyde datmen qualijck daer door henen conde, dan dese
drie Bedden dede den Weert het beste voor de twee Gasten decken, daer hy die
dede te bedde gaen, ende weynich tijdts daer na gheen van tween noch slapende
(hoewel datse de Mannekens maeckten van te slapen) dede hy zijn Dochter int
ander te Bedde gaen: ende int derde ginc hy met zijn Vrouwe slapen, dewelcke de
Wieghe daer het kint in was by het Bedde gestelt hadde daerse in lach. De saken
in deser voeghen geschiet zijnde, ende Pinuccio die alt'samen oversien
hebbende, nae eenighen cleynen verloop van tijde, hem dunckende dat elck een
wel in slaep was, is hy al soetkens opghestaen, ende is aen 't Beddestedeken
ge- | |
| |
gaen daer de Dochter lach, ende heeft hem by haer gheleydt:
Vande welcke hy (al wast met grooter vreesen) blijdelijck ontfanghen werdt, soo
dat hy met haer de vreucht raepte daer hun beyde meest verlanghen nae stondt,
nu Pinuccio dus mette Dochter zijnde, ist gheschiedt dat de Katte yet heeft
doen vallen int Huys door wiens gheruchte de Vrouwe wacker gheworden is. Ende
vreesende dattet yet anders waere alst was, is sy aldus sonder licht
op-ghestaen zijnde, in't doncker ter plaetse ghegaen daerse het gherucht
hoorde. Adriaen die nieuwers op en dacht, is by gheval om eenen dienst daer hy
niemandt anders om senden mocht, eens opghestaen, om den welcken uyt te rechten
heeft hy in 't gaen een Wiege ontmoet die de Vrouwe daer ghesteldt hadde, ende
niet voorby konnende sonder deselve te versetten, heeft hy die ghenomen ende
vande plaetse ghelicht daerse stondt, ende by het Bedde ghesteldt daer hy op
lach, ende als hy dat beschickt hadde daer hy om op-ghestaen was, is hy wederom
ghekeert sonder op de Wiege te letten, ende in zijn bedde ghegaen. De Vrouwe
nae datse bevonden hadde, dattet ghene dat ghevallen was, niet veel te bedieden
en hadde, en wilde deshalven de Keersse niet eens ontsteken om dat te sien, dan
op de Kat gheroepen hebbende, is sy inde Camer ghekeert, ende al tastende
reghel-recht ghegaen daer haeren Man lach en sliep, dan de Wiege daer niet
vindende, seyde in haer selven: O malloot als ick ben, siet wat ick gingh
bedryven, by mijn ziele ick ginck nae mijner Gasten bedde toe, daer nae alsse
voorder ginck ende de Wieghe vant, is sy int Bed ghegaen daer die by stondt, by
Adriaen, meenende by haren Man onder te gaen. Adriaen die noch niet in slaep en
was, dit voelende, heeftse wel ontfanghen, ende sonder meer woorden
heeft hy de hoochde daer op ghenomen, om te wijder van hem te connen sien, met
grooten ghenoegen van't wijf. De saken aldus staende, ende Pinuccio vreesende
dat hem de slaep met de Dochter overvallen mochte, is van haer opghestaen als
hyer zijn lust mede geboet hadde, om weder in zijn Bedde te gaen slapen, ende
derwaerts gaende de Wieghe ontmoet hebbende, meende hy oock dattet des Weerts
Beddestede was, weshalven hy wat voorder ghegaen zijnde, hem selven by den
Weert gheleyt heeft, die door Pinuccio comste ontwaeckt is. Doen heeft hem
Pinuccio meenende by Adriaen te wesen gheseydt: Ic wil u wel seggen dat
noyt sulcken soeticheydt als by Claesken is te ghelijcken, by den levenden
Pispot ick heb by heur sulcken ghenoechte ghehadt, als oyt eenighen Man by
Vrouwen hadde, ende ick verseeckere u dat ick ses Posten ghedaen hebbe, sint
dat ick van u scheydede. De Weert dese tijdinghe hoorende, die hem niet seer
ter herten en ginck, seyde eerst in sijn selven, wat Duyvel seyt dese? Daer na
heeft hy meer vertoornt als wel beraden zijnde tot Pinuccio gheseyt: Dat is een
schelmstuck van u geweest, ende ick en weet niet waerom dat ghy my sulcks
aenghedaen hebt, dan by gants pijpen, Trommelen, ick sal 't u wel betaelt
setten: Pinuccio die oock de wijste Jonghman vande Wereldt niet en was, zijn
dwaelinghe merckende, en dacht niet eens om die te beteren, als hy wel soude
connen doen hebben, maer seyde: wat suldy my betaelt setten? wat
kondy my doen? De Vrouwe vanden Weert die by haren man dacht te zijn, seyde tot
Adriaen: luystert na u gasten sy hebben woorden. Adriaen sprack al lacchende,
laetse gheworden, sy hebben | |
| |
te veel inghesopen. De Vrou dacht
datse haeren man hoorde kyven, ende Adriaen by de stem kennende, merckte wel
waerse gheweest was, ende by wien: Weshalven als sy wel bedacht stracks
opghestaen is, ende de Wieghe van haer kleyn Soonken ghenomen hebbende, heeftse
deselve met bedachten raedt voor haer dochters Bedtstede geset, ende is by haer
te Bedde ghegaen ende even als oft sy om haer mans kijven uytten slaep
ontsprongen hadde, heeftse hem gheroepen ende gevraecht wat woorden dat hy met
Pinuccio hadde. De Man antwoorde en hoordy niet wat hy seydt, dat hy desen
nacht met ons dochter bedreven heeft: De Vrouwe seyde: Hy liechter aen, door
zijn keele, hy en heeft by haer niet gheslaepen, want ick ben't die der by
slaepe, u verseeckerende dat ick noyt ooghe toeghehadt en hebbe sint dat ick my
te Bedde leyde, soo dat ghy wel een groote Beeste moet zijn in sulcks te
ghelooven. Ghy denckt savondts soo veel dat ghy snachts al droomende opstaet,
ende wandeldt hier ende daer sonder wetenschap, u latende voorstaen dat ghy
wonder bedrijft. Tis groote sonde dat ghy lieden den hals niet en breeckt, maer
wat doet Pinuccio daer, waerom blijft hy niet in zijn Bedde? Adriaen siende dat
de Vrouwe wijselijck haer selfs ende haer Dochters schande deckte, sprack oock
Pinuccio ick hebt u hondert-mael gheseydt, dat ghy noyt buyten u Huys en sout
gaen slapen, want dit ghebreck dat ghy hebt van dus al droomende op te staen,
ende de Fabelkens die ghy droomt, voor waerachtich te verhaelen sullen u eens
aen een ongeluck brenghen: keert hier dat u God een quaden nacht geve. De man
hoorde zijn wijf ende Adriaen spreken, begon te ghelooven dat Pinuccio
droomde. Dies hy hem beginnen heeft te stooten, segghende: Hou Pinuccio hou,
wort wacker ende keert in u Bedde. Pinuccio als een droomende mensch in
ander fantasien te treden: waer uyt de Weert begonnen heeft om 't seerste te
lachen quansuys doort stooten heeft hy de Mannekens ghemaeckt van te
ontwaecken, ende Adriaen toe-roepende, heeft hy gheseyt ist alree dach dat ghy
my roept: Adriaen antwoorde ja, keert maer hier, dese hem heel slaperich
ghelaetende en thoonende, is van by den Weert opghestaen, ende in zijn bed
gekeert, als de dag quam ende sy opgestaen waren, begon de Weert te
lachen, ende met hem te jocken met zijn droomen. De jonge Mannen hun Peerden
veerdich makende, ende metten Weert drinckende zijnse opgeseten en na
Florencen gekeert, niet min te vreden van de middelen soo de sake toeghegaen
hadde, als vant werck selfs, ende daer na ander wegen ghevonden
hebbende, is Pinuccio by Claesken gekeert, die haer Moeder aendachtich zijnde
hoe zy van Adriaen onthaelt was geweest, haer selven heeft laten duncken
dat sy alleen wacker ende niet slaperich was gheweest.
|
|
Auteursrechtvrij