Griane

Hoe Gerrat voorby passeerden ter plaetse daer Cardin het kint gelaten hadde, het welcke hy vont, ende met hem voerden om te doen opvoeden.

Het x. Capittel.

Den Berch daer Cardin den jongen sone van Griane gelaten hadde was ontrent een dach reysens van Constantinopelen ende men noemden die gemeynlick den Olijvenberch, alwaer hem onderhielde eenen arbeyder, rijc ende machtich, soo in Beesten als Palmen, Olyven, Dattelen ende ander vruchtdragende Bomen, de welcke al hoe wel hy een Lantman was nochtans seer neerstich ende voorsichtich in zijn saken, ende synen naem was Gerrat, wiens Vrouwe op den selfsten dach verlost was van eenen Jonghen Sone, maer was doot op de Werelt gecomen, waeromme desen goeden man seer verdrietich zijnde ghinck spatseren langhs desen berch, geheel droevich ende melancolyich om dat hy niet meer en hadde als een eenige Dochter, vanden ouderdom van drie Jaren, ende als hy quam ontrent den boom, waer by dat Cardin geleydt hadde den Jonge Prince, so hoorden hy hem schreyen, waerover hy hem verwonderde wat dat mochte syn, ginc allenskens naerder, so dat hy ten lesten eenen vont die hem een gelaet toonden als die gene die noch geen borsten na zijn geboorte gesoken en hadde, ende hy nam hem soetelicken in synen armen, ende siende dat hy soo schoon was ende wel geformiert, achten dat hem onser God desen ghesonden hadde, in recompensie van synen anderen dootbaren sone, ende comende by syn Vrouwe Marcelli ghenoemt, seyde tot haer, mijn vriendinne siet, wat wy wederomme vercregen hebben, ghy hebt huyden eenen dooden soon gebaert, ende Godt heeft ons eenen anderen levendigen gegeven, die ick u brenge ende hy vertelde haer hoe hy hem hadde vinden leggen

[p. 305]

onder eenen Palmboom, ende daerom bid ic u seyde hy, dat gy hem op wilt voeden, want het is de schoonste Creatuere diemen oyt met oogen aensach. De goede vrouwe nam het kint, ende hem ontwindende, sach de costelicke doecken daert inne gewonden was, ooc het cruysken dat hy aenden hals hadde hangen, doen dochtse wel dat hy van goeden huyse was, waeromme datse alsulcke deyrnisse met hem hadde, so datse begonste te seggen, ick geloove mijn sone, dat de moeder die u gedragen heeft, een groot leetwesen hadde alsse u also heeft moeten laten, maer nademael dat Godt u in mijnen handen gestuert heeft, so sal ick u opvoeden als mijn eygen kint, hetwelck sy ooc also dede, ende dat met sulcken liefde ende affectie, dat vele voor waerachtich hielden dat het Gerarts eygen kint was, die alle syn Gebueren nooden te comen op den Doope vanden selven Kinde, t'welc door advijs van haerluyden allen genoemt wort Palmerijn, om dat het onder eenen Palmboom gevonden was, ende het kint wies op in sulcker maniere, datment geoordeelt soude hebben ses jaren out te syn doent noch maer den tijt van drie Jaren hadde, op welcken tijt Marcelle bevrucht worden met noch eenen anderen sone, dien sy dede noemen Colmelie, die van Palmerijn daerna bemint worden als syn eygen broeder ende metgesel, gelijc u hierna somtijts verclaert sal worden, maer nu sullen wy hier af een wyl tijts swijgen om te vervolgen onse Historie, op dat ghy meucht verstaen hoe haer Griane gouvernierden na datse wt den kinderbedde opghestaen was, soo is te weten dat Griane Cardins wedercompste vernomen hebbende, hem dede ontbieden omte vragen hoe hijt met het kint ghemaeckt hadde, t'welck hy haer niet en wilde verswijgen maer seyde haer de waerheyt, waerom de ellendighe Princesse sulcken verdriet aenquam, dat het weynich scheelden, oft sy soude daer over doot gebleven hebben, niettemin, ten lesten bedenckende die gratie die haer onsen Heere verleent hadde, als haer bewaert hebbende voor schandalisatie ende oneere, leerdense daer na beter dissimuleren ende geveynsen haer verdriet dan te voren, ende begonste haer blijder te gelaten, ende gesont ende wel te pas te worden, waerinne de Keyserinne seer groote genoechte nam, hopende te volbrengen tgene haer voornemen was, ten dienst van haren neve Tarisius. Ende om dese oorsake sy met hare voorseyde dochter wesende op een tijt alleen, seyde tot haer: Mijn vriendinne en wildy niet volbrengen daer den Keyser ende ick u so dicwils om gequelt hebben? ick bid u dat ghy sulcx niet meer en wilt weygheren, oft anders suldy syne Majet. also doen vergrammen tegen u, dat het namaels u berouwen sal. Als Griane dese woorden van haer Moeder verstonde, ende wel wetende datse moeste, sy woude oft niet, so antwoordense haer me Vrouwe, ghy vint goet ende wilt hebben tegens mijnen danck, dat ick Tarisius tot eenen man neme. Ick salt dat doen, nadien dat het anders niet syn en mach, maer ick versekere u, dat van nu voortaen genen dag mijns levens passeren en sal of het sal my leet syn,

[p. 306]

ende indien my daer ouer eenigh ongeluck gebeurt, ende u eenige quellinge ende verdriet, so en wilt u daerom aen niemant beclagen als aen u selfst, die daer van d'oorsaecke zijt, nochtans wat claginghen ende vermaninghen dat haer Griane dede, so conde sy haer niet veranderen van opinie, ende sonder te bedencken het ongelijck daermede sy haer Dochter tempteerden, ginck den selven dach den Keyser bidden, (nademael syne Dochter haer nu wederom vonde in goede dispotie) dat hy woude volbrengen tgene men aengeheven hadde tussen haer ende zijn Neve, waer inne hy alsoo geringe ende promptelicken accordierden, in sulcker manieren dat ten eynde vande weke sy ende Tarisius aen malcanderen gehylickt waren, tot groot leetwesen vande Princesse, so dat de coleur van haer bleecke visagie genoechsaem betuychden, want als een yegelijck op de Bruyloft besich was om vreucht te hanteren ende goede chier te maecken, so met malcanderen lustich te eten ende te drincken, als ooc met danssen, singen ende springhen, begonste die droevighe Griane te dencken op haren Florendos haer achtende de alderonsalichste ende ongeluckichste vanden gheheelen Aertbodem, seggende in haer selfst: Eylaci mijn vrient wat sult ghy peynsen als ghy verstaen sult dese nieumaren ende ic sulcken ongetrouwicheyt bedrijvende, wat sal my tegens u mogen excuseren? Voorwaer ic heb wel reden om my voortaen te mogen vinden ende te voegen inde presentie vande gene die haer minnaers getrou zijn, oft die eenige professie maken van volstandige vrientschap, want noyt vrouwe en bedreef sulcke verraderie ende ongetrouwicheyt. Och wat is tgene dat ic doen, ende nochtans teghens mijnen danck ende wille, gelijck sekerhjck betuygen sal myn droevighe hert dat u is ende toebehoort so lange alst macht sal hebben te leven in dit erbarmelic lichaem het welc Tarisius gestolen heeft om u daer van te Frusteren. Maer hoewel datse alle den dach ghequelt was met sulcke gedachten, soo en had nochtans sulcx niet te beduyden met die ghene die haer aenstonden den toecomenden nacht als Tarisius wesende met haer alleene vertrocken woude beginnen te nemen de possessie so lange van hem nagejaecht, waer tegens sy dede alsulcke aspre ende resistentie dat hy gantsch niet ontwaer en worde van eenige voorgaende belegeringe ofte geschoten bressen, maer meynden (gelijck huydensdaechs meer als te veel gheschiet) dat hy de eerste was die t'Casteel bevochten hadde, in sulcker voeghen dat hy des anderen daechs smorgens also blijde ende wel te vreden opstonde, als hy syne Bruydt droevich ende gequelt in haer bedde liet. Wesende dan den Triumph ende Feest vande bruylofte volbracht, begeerden Griane met geheelder herten te vertrecken uyt het Hof des Keysers haren Vaders, so om te schouwen de oecasien van meer te horen de doleancien ende clachten van Florendos, als oock om de rigeur ende strafheyt die haer aldaer bewesen hadde geweest, waeromme datse Tarisius soo neerstelicken badt te verreysen, dat hyse in weynich dagen daerna met

[p. 307]

nam in Hongarien, maer voor haer vertrec ten tijde alsse soo van d'een als d'ander oorlof nam begonste de Keyserinne deyrlicken te schreyen, twelck Griane siende seyde tot haer: Mijn moeder hoe toont ghy nu sulcke droefheydt om de verreysinge van uwe dochter, die ghy so wreet toe geweest zijt, datse alleen door uwen middel gebannen wort uyt u presentie, ende uyt u Lant? waerom schreyt gy dan? nadien dat het u belieft heeft haer ongeluckich te maken, ende onweerdich te syn den naem der deuchdelicheyt, so lange alsse sal leven? Ic bidde Godt dat hy u sulcx wil vergheven, ende dat die eerste nieumaren die u van my gebootschapt werden u versekeren sullen van mijnen doot, dit geseyt hebbende gincse te peerde, sonder te toonen eenich gelaet den Keyser van ongeerne van daer te scheyden, ende wel geaccompaigneert zijnde reysdense so langhe tot datse quam in Hongarien met Tarisius, die liefde van den welcken hen van doen voortaen van dach te dag vermeerderden in sulcker manieren, dat hy hem achten te syn den aldergeluckichsten Prince van geheel Europa, want de Princesse wiste hem seer wel te behagen ende te obedieren in alle tgene daer hy playsier in nam, ende weynich tijdts daerna storf den ouden Coninck, so dat Tarisius in de Possessie des Coninckrijcx van Hongarien gestelt worde. Ende Griane hijlickten Lerine ende Cardin haren Broeder, die sy (als ooc alle de gene die met haer van Constantinopolen gecomen waren) met groote goederen ende rijcdommen begaefden, ende sonderlinghe Tolomestre, aen de welcke sy dickwils te kennen gaf die alderbinnenste ende secreetste gedachten haers herten, leydende alsulcken volstandigen ende Godvruchtigen leven, dat een yegelick hem daer af verwonderde, waer toe haer verwecten de knaginge haerder conscientien, over tverlies van haren Sone, twelck hem ordinaerlick vertoonden voor die oogen haerder gedachten, also datse God dienden nacht ende dach, om te vercrijgen remissie ende vergevinge van hare misdaet.