Griane

Hoe Griane Florendos eenen Rinck seynden deur Cardin; hem doende bidden, dat hy alle neersticheyt wilde aenvvenden, om hem te genesen, deur de liefde die hy tot haer droech, ende van t'antwoort dat hy hem gaf.

Het v. Capittel.

Alsoo haest als Griane haren broeder gelaten hadde, sy vertrocken wesende in haer Camer, begonste meer als te voren te fantiseren op den periculeusen staet van

[p. 285]

Florendos, alsoo datse dese navolghende coutinghe hielde met haer selven, Voorwaer ick en weet gheen levendich creatuyr alsulcken swaren straffe verdient hebbende als ick doe, als zijnde oorsaecke vanden doot, vanden vroomsten Ridder der gheheele Werelt, aengesien dat alleene die liefde die hy tot my draecht ende geen ander dingh hem ghebrocht heeft inden noot daer hy tegenwoordich in is, maer indien hy sterft ick versekere my, daer van te nemen alsulcke wrake ouer my selfst, dat ick niet en sal leven een ure alleen na hem, en ist dan niet beter dat ic ende hy t'samen in vreuchden ende wel te vreden leven? Jaet voorwaer, ende sal alsoo veel doen, aleer my de droefheydt des duysteren nachts sal overvallen, oft mijn ruste nemen sal, dat ick sal weten voor de waerheyt, oft het in mijne macht is, hem remedie te geven oft niet. Ende in dese verstoortheyt dede sy roepen eenen Jongelinck Sone van hare Voetstere ghenoempt Cardin, inde welcke sy haer grootelick betrouwende, ende seyde tot hem: Cardin, u is welbekent de vrientschap die ick tot u moeder drage als oock tot u, om harent wille, - ende ick heb u van langhen tijt gheproeft my te syn een goeden ende ghetrouwen Dienaer, nu vertoont sich dan, de beste ghelegenheyt om u te bewijsen, also metter daet te zijn, verswijgende tgene ick u verclaren sal, ende bewarende mijn secreten, die welcke een Keysers dochters ben. Cardijn wijs ende voorsichtich zijnde, hoorende Griane hem doen dese voorhoudinghen, dochte wel, dat sy hem wilde ontdecken eenige saecke van haren aldersecreetsten handel, waeromme dat hy antwoorden, ick soude veel liever lijden datmen my ontleede van Lidt tot Lidt, dan dat de geringste sake die u gheliefden my te ghebieden, deur my (sonder u bevel) gheopenbaert soude worden, ende sult my bevinden so lange als ick leven sal, u ghetrouwe ende onderdanige Dienaer. Dat is tgene dat ic altoos van u gheoordeelt hebbe antwoorde de Princesse, nu welaen dan, verstaet t'gene ick u ghebieden sal. Ick hebbe voor die waerheydt verstaen, ende wete dat de groote siecte van Florendos gecomen is van weghen een wtermaten groote liefde die hy tot my heeft, ende om dattet soude syn een al te grooten schade door mijne schult te verliesen een alsulcken Prince, soo bidde ick u dat ghy hem van mijnent wegen wilt aenseggen, dat hy doch alle neersticheyt gebruycke om zijne gesontheydt wederomme te vercrijghen, ende sooder yet in mijn machte is dat daer toe soude moghen dienen, dat hy sulcx sal mogen eysschen als vande ghene die hem meer bemint als haer eyghen selfs, ende in een teycken van dien ick hem seynde desen Rinck, die welcke hem sal ghelieven te bewaren, om mijnent wille, my doende van nu voortaen eenen yeghelijcken dach verstaen van sijnen staet. Me vrouwe antwoorden Cardin, God wil my gratie geven, dat ick u alle beyde mach helpen wt het verdriet, want soo als my dunckt, soo en weet ick gheenen Ridder, die u beter verdient heeft als hy. Gaet dan seyde Griane, ende dat uwe wedercomste cort sy, daeromme Cardin stracx ginck recht

[p. 286]

na syn Logijs, ende incomende vont hy Caniam, die van hem quam, hem ghelaten hebbende in alsoo quaden state alst mogelick was, merckende dat syn cranckheydt van ure tot ure ergerde, nochtans Cardin als wel bedacht zijnde, en wilde sich aen hem niet vertoonen, maer ginck voort sonder verbeyden inde Camer van Florendos, ende als hy de deure open dede, hoorden hy hem clagen, seggende: Och God, moet ic sterven sonder hoope van eenige remedie. Ende als hy dese woorden voleynden, so ginc Cardin tot hem hem goeden avont wunschende, ende heel sachtelic seggende, hoe dat de Princesse Griane hem tot hem ghesonden hadde, om te weten hoet met hem stonde, ende gelooft vryelic (mijn Heer) seyde hy, dat ick noyt en sach Princesse alsoo moeyelick zijnde, als sy is om uwe qualickvaert, ende sy gebiet haer seer ernstelicken in u gratie, ende seynt u desen rinck, tot een versekeringhe van liefde, die sy tot u draecht, u biddende alle middelen te gebruycken, die u moghelick syn, om haeste te ghenesen, op dat sy u sien ende spreken mach van saecken, die haer niet min als u aen en gaen. Van dese woorden worde Florendos alsoo verandert, so dat hy lange twijfelden oft het eenen droom ofte waerheyt was dat hy hoorden seggen, want al kende hy den bootschapper soo wel, als eenighen anderen int Hof, soo en coste hy nochtans is synen sin niet begrijpen dat een alsulcke weldaet hem soo gheringhe ouercomen was, ten lesten verseeckerde hy hem in sulcker manieren dat hy den Rinck aen nam, ende die meer als duysent reysen kusten, daer na omhelsende Cardin, soo vrientelick als hy coste, antwoorden hem. Eylaci mijn vrient, is het moghelick dat me Vrouwe alsulcke ghedachtenisse van my heeft, die haer noyt eenigen dienst en dede? Jaet seyde Cardin ende sy doet u ooc weten, dat indien ghy haer bemint, sy verbeydende is, dat ghy haer daer van getuygenisse ende verseeckeringhe doet, door de vercrijginghe van uwe gesontheyt in een corte ghenesinge, mijnen grooten vrient antwoorden hy ick sal haer onderdanich zijn alle mijn leven, in alle t'ghene dat haer ghelieven sal my te gebieden, ende ic verseeckere u dat ick my albereets also verlicht vinde door dese blijde nieuwe tijdinghe, dat ick my binnen drie dagen tot haer voeghen sal, om haer seer ootmoedelijcken te bedancken, ende ick bidde u daerentusschen haer de reverentie te doen van mijnent weghen, die welcke doot was, sonder de hulpe die sy my verleent heeft. Alsdoen nam Cardin van hem oorloff, ende keerden wederom tot Griane, die welcke hem verwachten met grooten yver, om te weten hoe hy hem droech de gene daer sy hem toe gesonden hadde.