Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXLVI.

Hoe hertoge Philips sont om sijn bruit ende hoe corts daer na hij van deser werelt gescheiden es.

Tusscen den heere wide bekant
Philipse hertoghe van Brabant
Ende vrouwe Yolenten rike,
Dochter van coninc Lodewike
Van Sicilien, si u vercleert,
Was een huwelijc ghetracteert.
Want si malcandren, hoordic oorconden,
Van machscape ten derden bestonden,
Soe hadde paus Merten minnentlijc
Gheorlooft tselve huwelijc
Tusscen hem beiden, dat ghijt wet,
Ende ghedispenseert daer met.
Ende daer na, doe ic ghewach,
Was beteekent een dach
Dat men die vrouwe soude sniemen
Leveren in der stat van Riemen
Des hertoghen vrienden vore vercleert.
Dus heeft die hertoghe gheordineert
Heeren Inghelbrechte van Edinghen claer
Ende den heere van Rotselaer,
Den heere van der Rivieren ende met hem
Janne heere van Boutershem
Ende vele meer andere, si u bekant,
Sijns ridderscaeps uut Brabant,
Wel met III^c peerden oft bat,
Die hi sant om in der stat
Van Riemen tontfane met eere groot
Yolenten die vrouwe Meynioot,
Ende van daer met weerdicheiden
In Brabant te bringhene sonder beiden.
Binnen dien tide, hoort mi verclaren,
Dat dese heeren ghereden waren
Te Riemen waert met grooter eere,
Es hertoghe Philips die vrome heere
Siec worden alst hem moeste scinen.
Sijn meesters van medicinen
Hebben na harer consten aert
Hem ghepijnt te helpene, si u verclaert;
Maer die ziecte, ten halp gheen passen,
Es vaste ghesterct ende ghewassen,
Ende alsoe zeere, dat [hi], segghic di,
Es bleven ligghende. Ende hi
Heeft in goeder verstennessen
Ende in grooter bekinnessen
Sijn testament gheordineert,
Sijn biechte ghesproken, ende vercleert
Den priester sijn sonden volcomelike,
Sijn sacramenten devotelike
Minlijc ontfanghen die heere milde;
Ende ten utersten, alst God wilde,
Heeft hi die scout der naturen
Betaelt sonder langher duren,
Ende es menscelike versceiden.
God wille sijn lieve ziele gheleiden
Door sijn groote ontfermicheit
Ende croonen se in die ewicheit!
Ende als sijnen raden, segghic di,
Ende ridderscape, dat hi
Ghesonden hadde, soe ic vermane,
Om vrouwe Yolenten tontfane
Ende te bringhene in Brabant,
Dese niemare wert bekant:
Hebben si die sonder verlinghen
Voort ghecondicht der coninghinnen
Van Sicilien ende sijn tehant
Weder ghekeert in Brabant
Bedroeft met grooter zeericheit;
Ende vrouwe Yolente voorseit
Wert te huwelike na tgone
Ghegheven shertoghen outsten sone
Van Bertaengien eerbaerlike;
Ende die coninc van Vranckerike
Hadde haer suster, dit versinne,
Ghetrouwt, ende was coninginne.