Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXLIII.

Vanden gheschille tusschen hertoge Phylips van Brabant ende hertoghe Aernde van Ghelre.

Van Brabant die derde hertoghe Jan
Die gaf voortijts, hout u daer an,
Vrouwe Marien sijnre ioncster dochter rike
Hertoghe Reinoude te huwelike
Van Ghelre. Daer met gaf hi hem al bloot
Van ghelde een somme groot
Op voorwaerde tusscen hen beiden
Daer af ghemaect ende ondersceiden
Ende ghevesticht na haer ghelieven
Met openen bezeghelden brieven:
Oft gheboerde, soe ict belie,
Dat hertoghe Reinout ende vrou Marie
Engheen gheboorte, verstaet den sen,
Levende en lieten achter hen,
Dat die erfghenamen dan
Hertoghen Reinouts, hout u daer an,
Den rechten oore sonder begheven
Der selver vrouwen Marien voorscreven
Die somme van penninghen sonder omhalen
Souden weder gheven ende betalen.
Ende want van hem beiden, sijts ghewes,
Gheen gheboorte ghebleven en es,
Versocht hertoghe Philips tsiere vrame,
Als recht oor ende erfghename
Van der ouder moyen sijn
Vrouwen Marien, verstaet den fijn,
Hertoghe Arnde alsoe houde
Van Ghelre, datti hem woude
Die somme van den penninghen sonder falen
Oplegghen ende betalen.
Dies de hertoghe, sijt seker das,
Niet ghesint te doene en was,
Segghende dat vrou Marie voor desen
Vele iare doot hadde ghewesen;
Ende meinde, hadde men tgelt int fijn
Haren erfghenamen sculdich ghesijn,
Die hertoghen in gheenen weghen
En hadden soe langhe niet ghesweghen
Van Brabant, si en haddent gheopenbaert.
Hier omme wert meneghe dachvaert
Ghehouden tot meinde termine.
Ten utersten soe meinde tsine
Te ghecrighene in eeneghen keere
Hertoghe Philips die edel heere,
Ende versocht sijn lant al doe
Van Brabant dat si hem daer loe
Jeghen den hertoghe van Ghelre tehant
Hulpe deden ende bistant.
Als dat den hertoghe quam voor ooghen
Van Ghelre, soe es hi ghetoghen
Bi den hertoghe van Bourgongien
Ende vertrac hem al den sen
Ende van der zaken tondersceit.
Ende want die hertoghe voorseit
Ghetrouwet hadde, verstaet tghedichte,
Shertoghen van Bourgongnen nichte,
Siere suster dochter, hoort na mi,
Van Cleve: soe en woude hi
Tusscen sinen neve van Brabant
Enten hertoghe van Ghelre, si u bekant,
Engheen oorloghe laten op risen,
Ende dede met ernstegher wisen
Sijn raetsliede dedinghen tehant;
Soe datse maecten een bestant
Binnen welken tiden onghespaert
Men soude houden een dachvaert
In der stat van Mechelen,
Daer die hertoghe van Bourgongien,
Van Brabant ende van Ghelre mede,
Versamen souden in der stede.
Daer soude die hertoghe voorseit
Van Bourgognen, ierst tbesceit
Aenghehoort, altehant
Sinen voorseiden neve van Brabant
Ende van Ghelre, soe ic oorconde,
Eens maken, op dat hi conde,
Ende aldus es die zake voorscreven
Tusscen die heeren hanghende bleven.