Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXLII.

Hoe de hertoghe op vyf heeren verbolghen waert ende hoe hyse weder tot synder gratien nam ende hoe enighe van sinen huysghesinde ghecorrigeert woorden.

Cort na den Heileghen Paeschdach
XIIII^c XXVIII, doe ic ghewach,
Dede hertoghe Philips tehande
Versamen die state van sinen lande
Van Brabant in der stat van Liere.
Na tsceiden der dachvaert, soe sant sciere
Die hertoghe heere Claeuse, dat wet,
Van Sinte Goerics ende ooc met
Van Meingersreeuwt Diederike
Sinen hofmeester haestelike
Aen den greve van Conversant,
Van Breine, heere tot Edinghen ghenant,
Ende tot Inghelbrechte mede
Greve te Nassouw ter waerhede,
Heere ter Leck ende te Breda.
Tot Janne sant hi ooc daer na
Van Wesemale, dits openbaer,
Tot den heere van Rotselaer,
Tot Janne van Schoonvorst, sijt seker das,
Die borchgreve te Montjouwe was,
Met sekeren bootscapen ghelast te doene
Van sinen weghen aen die baroene;
Daer die heeren uut verstonden rechtvoort
Dat die hertoghe op hen was ghestoort
Ende verbolghen herde zeere;
Dies si en meinden in gheenen keere
Verdient te hebbene in gheenre maten.
Dien abolch ontsiende utermaten
Haers heeren shertoghen, ende mids dat,
Reden si rechtevoort uter stat
Van Liere, uut haers heeren ooghen,
Ende elc es op tsine ghetoghen.
Als dat den hertoghe quam ter oren,
Wert hi toornegher dan te voren.
Hier na hebben sonder verlaten
Die twee weerlike staten
Met harer beden ghearbeit zeere
Ende gheworven aen haren heere
Dat hi hen liet bliken meer ende men
Die zaken ende die redenen
Daer omme dat hi verbolghen was
Op die heeren daer ic vore af las.
Op twelke dat si rechtevoort
Der heeren antwerde hebben ghehoort.
Ende die zaken alsoe tien tiden
Wel verstaen in beiden siden,
Hebben si verstaen ongheloghen
Dat eneghe dieneren shertoghen
Hadden over die heeren vore vercleert
Den hertoghe tonrechte gheinformeert;
Ende aldus hebben met goeder maten
Die twee weerlike staten
Met onderwise, met ernsticheden,
Aen den hertoghe met harer beden
Verworven dat hi die heeren lofsam
In sijnre gunst ende gracien nam,
Ende heeft hen den last onverholen
Siere herberghen ende sijns staets bevolen.
Voort hebben met voorsienicheit
Die twee weerlike state voorseit,
In der stat van Herenthals samentlijc
Daer omme vergadert notabelijc,
Bi oorlove des hertoghen voorscreven
Ghecorrigeert sonder begheven
Sesse persoone, dats sonder si.
Van sinen huusghesinde, die zi
Besculdicht vonden meer ende men
Van der onrechter informacien,
Op dat dander hen souden wachten meere
Aen te brenghene haren heere
Onrechte zaken in enegher maten
Over sijn ghetrouwe ondersaten,
Ende si met alselken bedroghe
Niet meer en vergramden den hertoghe.