Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXLI.

Hoe de ierste hertoghe Philips in Brabant als heere ontfangen wert ende van sinen raede ende vander beeden die hem wert gheconsenteert.

Na Paesscen herde cort daer naer,
XIIII^c XXVII Ons Heeren iaer,
Dede hertoghe Philips tehande
Die staten van Brabant ende siner lande
Versamenen, met corten woorden,
In der stat van Vilvoorden.
Ghesproken soe heeft men aldaer
Van den rechten der landen, dats waer,
Die men in someghen poenten ter vaert
Verbetert heeft ende verclaert,
Soe die privilegie dat claerlijc
Begrijpt, bewijst volcomelijc
Bi den hertoghe verleent ende ghegheven,
In der stat van Vilvoorden ghescreven
Ende beseghelt, doe ic ghewach,
Int iaer voorscreven den XXIII^sten dach
In de maent van meie. Dit dus ghedaen
Wert hi te Lovene ierst ontfaen,
Ende doen te Bruessele, ende alsoe voort
Tot anderen steden, alsoet behoort,
Als heere ende prince eerbaerlike
In manieren behoorlike,
Met sunderlingher sollempniteit
Ende met minliker weerdicheit.
Daer na steldi met goeder stade
Sijn raetcamere ende sijn rade
Die sijn zaken ende heerlicheiden
Souden helpen met wijsheiden
Besorghen, bewaren in allen dinghen.
Ende dat beval hi zunderlinghen
Janne van Schoonvorste in goeder trouwen,
Die borchgreve was te Montjouwen,
Heere te Cranendonc sekerlike
Ende te Diepenbeke derghelike;
Dien hi gheloofde in alder wijs
Om dat hi hertoghe Anthonijs
Sinen vader, wilt verstaen,
Menichfuldeghen dienst hadde ghedaen.
Hi maecte ooc herde scier
Meester Janne Bont sinen cancellier,
Die sinen vader; doe ic ghewach,
Ende sinen brueder te dienen plach.
Als hertoghe Philips, daer men af telt,
Sijn saken aldus hadde bestelt,
Dede hi vergaderen tehant
Die staten sijns lants van Brabant,
Ende begheerde dat si tsinen begheeren
Hem wilden een bede consenteeren
Om someghe siere lande, te waren,
Ende renten die becommert waren
Te lossene, ende ander zaken mede,
Die hi den staten aldaer dede
Notabelijc vercleeren, seker sijt.
Ende hoe wel dat tot dier tijt
Niet ghesloten en waert daer van,
Soe hebben die staten des lants nochtan
Hem namaels op een dachvaert
Die tAntwerpen ghehouden waert
Een seker bede gheconsenteert
Tot sekeren terminen gheordineert
Ende op voorwaerden besproken claer,
Ghedraghende toter sommen aldaer
Tot drie hondert duust croonen, dat wet,
Ende viventwintich duust met.
Om dien ontfanc te regeeren,
Na dordinantie te bekeeren,
Worden gheset ende ghecommitteert
Twee van den edelen, si u vercleert,
Ende twee goede manne uten steden:
Heer Heinric van Diest ter waerheden,
Heere van der Rivieren, dat wet,
Ende heer Wouter van Kersbeke met,
Heere van Stalle ende van Godsenhoven,
Twee riddere die men wel mocht loven.
Van Bruessele was met hem ghecoren
Willem van Heersele, wilt mi hooren,
Willem Noyts, van Antwerpen.
Dese IIII persoone, ic seker ben,
Hebben dese bede voorscreven
Ontfanghen ende uutghegheven
Na begrijp harer commissien,
Ende daer af meer ende men
Goede rekeninghe ghedaen
Ende volcomen quitantie daer af ontfaen.