Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXL.

Vanden greve van Saint Poul ende wat hy binnen der tyt hertoge Jans syns brueders gehanteert ende ghedaen hadde.

Na die doot des goeden heeren
Hertoghen Jans, soe moeste keeren
Dat hertoghedom van Lothrike,
Van Brabant, van Limborch samentlike
Op Philipse sinen broeder,
Greve van Lyney, sijts vroeder,
Ende van Saint Pol, dits claer ende bloot,
Die welke na sijns vader doot
Met hertoghe Janne woonde, neemt goom,
Van Bourgognen sinen oom.
Uut Vranckerike waert hi daer naer
In Brabant ghehaelt, dat es waer,
Als hertoghe Jan, wilt mi versinnen,
Met Vrou Jacoppen siere ghesellinnen
Ende den edelen van Brabant
Niet en verdroech, si u bekant,
Ende wert ruwaert ghemaect al daer,
Als ic u vore dede verclaer,
Des lants van Brabant sonder verlaten,
Met overdraghe van den drie staten.
Welc ruwaertschap droech die heere
Dat hem des tlant bedancte zeere;
Ende als die zaken, si u bekant,
Te saten waren bracht int lant,
Heeft hi truwaertscap sonder begheven
Hertoghe Janne overghegheven.
Hier na, dat si u bekant,
Als met machte quam int lant
Van Gloucestre die hertoghe
In Henegouwe met moede hooghe,
Heeft greve Philips die heere voorbaer
Doorloghe aenghenomen daer
Van sijns brueder weghen saen,
Ende al den last onderstaen,
Ende metten lande, als heere ghetrouwe,
Van Brabant ghetoghen in Henegouwe,
Ende theer van Brabant vroomelike
Gheleit ende bewaert ghetrouwelike.
Want sijn broeder, si u bekant,
Trecken moeste in Hollant
Overmids die doot, hout u daer an,
Sijns ooms van Beieren hertoghe Jan.
Dus was die greve Philips certein
Hoot ende overste capitein
Bi den hertoghe Janne vore vercleeert,
Sinen brueder, daer toe gheordineert.
Na dat tlant van Henegouwe voorseit
Weder bracht was ter ghehoorsaemheit
Sijns brueders des goedertieren heeren,
Es hi ghetrocken met grooter eeren
Tot Roomen in des paus hof,
Om te ghecrighene oorlof
Moghen te treckene, dit vernem,
Ten heileghen grave te Jherusalem
Ende (in) dander heileghe steden
Daer omtrent, ter salicheden
Ende in verlatenessen siere zonden,
Te visenteerne. Tien selven stonden
Hadde ghewesen een strijt
Tusscen den soudaen, des seker sijt,
Enten coninc van Cypers, dats waer.
Die Kerstene hadden vele scaden daer.
Mids dien en wilde, wats gesciet,
Paus Merten hem oorloven niet
Die pelgrimagie daer te doene.
Mids desen bleef die heere coene
Met sinen state langhen tijt
Bi den paeus te Roome, seker sijt,
Die hem eere ende weerdicheide
Grootelijc bewijsde ende dede.
Ende als hi weder van daer quam
In Brabant, alsoe ic vernam,
Wert hi van den hertoghe rike
Sinen brueder ontfanghen guetlike.
Hier na es hertoghe Jan ghestorven
Sijn brueder, ende hi heeft verworven
Van rechter gheboorten, dat wet,
Die lande ende heerlicheiden met
Van den Brabantscen rike
Ende over Mase desghelike.