Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXXIX.

Van hertoghe Jans manieren ende van sinen Love ende hoe hy na sijnre doot gheclaegt waert.

Hertoghe Jan die heere bequame,
Die de vierde was van dien name,
Sone des hertoghen Anthonijs,
Regheerde Brabant, die heere wijs,
Twelfdalf jaer oft daer bi.
Binnen welken tiden dat hi
Vele onghenuechte hadde voorwaer,
Ende vele vreemder zaken claer
Ghescieden, als vore bescreven staen.
Ende in allen dien, doe ic vermaen,
Was hi verduldich, wes hem ghesciet,
Ende en vergat Gode emmer niet
Te lovene nacht ende dach,
Dien hi vreesde ende ontsach,
Ende loofden (van dien) des hi hem toe sant.
Ooc en vergat die heere vaillant
Der ermer niet, dat elc ghevroede:
Met sinen tideliken goede
Versach hi die mildelike,
Soe dat hi van hen ghemeinlike,
Van den armen menscen algader,
Ghenuemt wert der armen vader.
Hi was ghespaersaem ende goedertieren,
Sachtmoedich, sedich van manieren,
Ende antwerde gueteliken
Soe wel den armen als den riken
Die hem daden eeneghe clachten,
Ofte eeneghe bootscappen aenbrachten,
Oft die anders, wats ghesciet,
Met hem hadden te sprekene iet.
Die erme claeghden allegader
Tverlies van haren milden vader.
Hi wert gheclaeght ooc utermaten
Van allen sinen ondersaten
Met rouweghen herten, met bitteren zeere,
Die haren sachtmoedeghen goeden heere,
Ghenedich, goedertieren daer bi,
Verloren hadden. Ooc wert hi
Gheclaeght zeere utermaten
Van sinen nabueren ende ommesaten,
Die hi en verlaste clein no groot;
Maer bistant in hare noot
Altijt bewees na ende bi.
Ende boven al soe was hi
Van sinen dieneren, si u ghesaeght,
Onsprekelike zeere gheclaeght.
Ic spreke ooc wel acherme! met recht;
Ic was sijn dienere ende sijn knecht,
Sijn doot magh ic wel claghen zeere:
Die edel goedertieren heere
Gaf mi tot soe menegher stont
Soe menich suet woort met sinen mont,
Dat mi allen dat leven mijn
In mijn herte gheprint sal sijn:
Ende sijnre zielen, wats ghesciet,
En meinic te verghetene niet
Soe langhe als mi God laet leven.
God wille sijnre zielen gheven
Deeweghe vroude van hemelrijc,
Als ic hope, volcomelijc.
Des spreect, alle die hier hooren na,
Pater noster ende Ave Maria
Voor die ziele des edelen heeren
Gode ende sijner Moeder teeren;
Datten die Heileghe Triniteit
Croonen moet in deewicheit. Amen.