CXXXVIII.
Vander uytvaert ende exequien, ende hoe hertoge Jans lichame
begraven wert.
Int iaer Ons Heeren, soe ghelach
XIIIIc XXVII die Paeschdach
XX in aprille, doe ic u cont,
17000[regelnummer]
Ende noch des hertoghen lichame stont
In den hove te Bruessele binnen
Op Coudenberch, nu wilt bekinnen,
Ghebalsemt, soe ic u dede verclaer,
Tot des dijnsdaeghs daer naer
17005[regelnummer]
XXII in aprille, na sijn betame.
Doen wert dat doode lichame
Na der noenen met groter weerdicheit,
Met processien ende sollempniteit,
Met vele tortsen, met crucen, met vanen,
17010[regelnummer]
Met menichfuldicheit van tranen,
Met droefheit ende met grooter claghen,
Van Coudenberch uten hove ghedraghen
Tot Sinte Goedelen in der kerken.
Daer worden van papen ende van clerken
17015[regelnummer]
Vigilien ghesonghen, hoordic lien,
Met kerkelijken serimonien
Over hem, met grooter devotien daer.
Ende des anderdaeghs daer naer,
Te wetene des goensdaeghs onghewaent,
17020[regelnummer]
Drientwintich der selver maent,
Wert in der selver kerken voorseit
Een messe met grooter sollempniteit
Over die ziele ghesonghen daer,
Ende ter stont cort daer naer
17025[regelnummer]
Wert dat doode lichame voorseit
Op een rosbaer met grooter zeericheit
Alsoe ghebracht toter Vueren
In St Jans kerke ende in dier uren
Worden van ierst statelijc
17030[regelnummer]
Vigilien ende messe devotelijc
Ghesonghen, ende ten inde van desen
Wert shertoghen lichame, hoort mi lesen,
In den hooghen choor voor den altaer
Bi sinen vader begraven daer,
17035[regelnummer]
Ende bi siere moeder, si u verclaert.
Ende in deser selver uutvaert
Waren metten greve utermate
Van Saint Pol vele abtde ende prelate,
Greven, baenrotsen, ridderen, knapen,
17040[regelnummer]
Ende vele goeder manne van wapen,
Entie ghedeputeerde, si u bekant,
Van den steden slants van Brabant.
Als dese exequien, wilt verstaen,
Na behooren waren ghedaen,
17045[regelnummer]
Es die greve van Saint Pol na das,
Die toecomende hertoghe was
Van den lande, omme, wilt versinnen,
Weder comen te Bruessele binnen
Op thof van Coudenberch voorscreven,
17050[regelnummer]
Ende aldaer soe es hi bleven,
Die doot bescreiende langhen termijn
Van den lieven brueder sijn.
|
|
Auteursrechtvrij