Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXXV.

Hoe die hertoghe van Bourgognen regent van Hollant ende van Zeelant de stad van Sevenberghen met machte beleide ende ghecreech.

Vrouwe Jacob lach te deser tijt
Te Schoonhoven in Hollant, des seker sijt,
Ende hadde ooc in haren behoude
Ghecreghen die stat van der Goude.
In dien steden hielt si als die fiere
Volc van wapenen ende soudeniere,
Daer si met scadichde ende dede pant
Den anderen steden van Hollant
Die haer waren onghehoorsam.
Van Sevenberghen, soe ic vernam,
Die heere die hielt meer ende men
Partie met Vrouwe Jacoppen,
Ende dede vele scadelijcheden
Den cooplieden van anderen steden
Uut Sevenberghen sijnre stat,
Die op twater verkeerden, alsoe dat
Die hertoghe van Bourgognen, dat versent,
Dien die hertoghe van Brabant tregement
Van Hollant ende van Zeelant
Bevolen hadde, als coene wigant
Met grooter macht zeere vermoghen
Voor Sevenberghen es ghetoghen
Ende beleit te watere sonder sparen,
Soe dat die van binnen besloten waren.
Ende na dat hi daer vore, des seker sijt,
Gheleghen hadde eenen langhen tijt
Wert daer een respijt ghededinght naer,
Om sprake te houdene, ende aldaer
Sant van Bourgognen die heere
Den joncheere van Gaesbeke ende meere
Andere groote heeren, ic segghe u dat,
Binnen Sevenberghen der stat
Om te dedinghen met wisen keere.
Die boden van Sevenberghen den heere
Een groote somme van ghelde, dats waer,
Datti hadde willen gheloven daer
In den oorloghe, verstaet den sen,
Tusscen den hertoghe ende Vrouwe Jacoppen
Stille te stane, sonder tien tiden
Hem des te bewindene teenegher ziden,
Ten ware dat men striden soude.
Oft dat ghebeurde, waer hi dan woude
Soude hi moghen striden in trouwen
Metten hertoghe oft metter Vrouwen.
Die hertoghe van Gaesbeke riet den heere
Van Sevenberghen herde zeere
Sinen neve in rechter trouwe,
Dat hi dat alsoe doen wouwe.
Vele onderwijs dede hi hem doe
Om hem te bringhene daer toe.
Maer wat men hem seide oft riet,
Hi en woude tractaet aenverden niet.
Dus es die dedinghe aldaer
Ghesceiden ende tbestant daer naer
Es verstreken ende uutghegaen.
Daer na dede die hertoghe saen
Die stat al omme na behooren
Vaster belegghen dan te voren.
Ende als dat saghen die van binnen
Ende hen quam in haer bekinnen
Die offere die ghi vore hebt verstaen,
Die de hertoghe hadde ghedaen,
Die haer heere nam in onweerden
Ende met en hadde willen aenveerden:
Soe hebben se daer na eer iet lanc
Jeghen haers heeren wille ende danc,
Die niet en conde ghekeeren dat,
Van Sevenberghen die voorseide stat
Op ghegheven in die hant
Van Bourgognen den heere vaillant.
Ende die heere van Sevenberghen claer
Wertter uut verdreven daer,
Ende es voortane, alsoe ghi hoort,
Een arm ridder bleven voort.
Dit ghesciede int selve iaer
Van sessentwinteghen, dats waer.