Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXXIII.

Hoe de universiteit vanden scolen inder stad van Lovene opgheset waert ende ghecreghen.

Hertoghe Jan die edel heere
Minde die Heileghe Kerke zeere
Ende die clergie sonderlinghe,
Ende bedachte sijn lant gheringhe
Te versiene erfelike
Van enen juweele ontsterfelike,
Dat es te wetene, onverholen,
Van eenre gheprivilegieerder scolen,
Daer sijn ondersaten, hoort mi tellen,
Ende ander haer kindere mochten stellen
Om conste ende wijsheit, der ic wel lien,
Te leerene, die si te dien tien
Buten sinen lande elderswaer
Soeken moesten hier ende daer.
Ende dese scole, ic segghe u dat,
Haddi meininghe in der stat
Van Bruessele te legghene, ende dede
Des spreken met eeneghen van der stede
Die daer toe niet gheneight en waren
Noch en rieden, hoordic verclaren,
Segghende: dat die studente in hindere
Violeren souden der liede kindere,
Ende dat dan risen mochte in der stat
Onraet, ghescille ende debat.
Hier na die hertoghe spreken dede
Met eeneghen van Lovene der stede,
Die daer toe vielen gheheellijc,
Ende hebben den hertoghe oetmoedelijc
Daer om ghebeden met ernsticheit.
Alsoe heeft die hertoghe voorseit
Ghescreven ende aen den paus ghesonden
Merten den vijfsten, die tien stonden
Ter beden van den hertoghe goet
Een ghemeine studium, sijts vroet,
Ende scole gheprivilegieert
Van allen consten gheordineert
Ende gheset heeft in ewicheit,
Sonder alleene in der godheit,
Int stat van Lovene, van dien termine
Voortane ewelijc te sine.
Ende heeft daertoe sonder sneven
Privilegien verleent, ghegheven,
Cancelliers, conservatoers ooc met
Gheordineert ende gheset,
Alst blijct bi den bullen wel gheraect
Int hof van Rome daer op ghemaect
In den iare Ons Heeren, dits openbaer,
Veertien hondert ende XXV iaer,
Neghen daghe in decembri.
Daer na heeft die hertoghe vri
Notable doctore onghelet
Ontboden ende meesters met
Van allen consten, sonder beiden,
Van der godheit alleene uutghesceiden,
Ende bi sijnre stat na sijn begheeren
Van Lovene doen stipendieeren.
Die haer ierste lesse, ic seker ben,
In harer consten elc van hen
Ter eeren Gods, soe wi oorconden,
Ierst aenhieven ende begonden
Opten iersten dach dat segghic di,
Der maent van novembri
In den iare Ons Heeren, segghic u claer,
XIIII^c sessentwintigh iaer.