Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXX.

Vanden stryde te Bruwershaven in Zeelant tusschen den hertoge van Bourgongnen ende dInghelsche.

Na desen es Vrouwe Jacoba
Uter stat van Ghent cort daer na
Heimelijc ghetoghen, si u bekant,
Al tot Scoonhoven in Hollant,
Ende daer sijude met subtilicheden
Heeft si someghe edele ende steden
Van den lande ghetoghen aen hare.
Als in Inghelant quam die mare
Heeft die hertoghe, ongheloghen,
Van Gloucestre rechtvoort vertoghen
Sijn opset, soe ict hebbe vernomen,
Om weder in Henegouwe te comen,
Ende den heere van Filwater, ic seker ben,
Met vele volcs van wapenen
Te scepe ghesonden, si u bekant,
Om bi Vrouwe Jacoppen in Hollant
Te treckene, ende om aldaer
Te makene oorloghe swaer
Metten vrienden, verstaet den sen,
Der selver Vrouwen Jacoppen.
In desen selven tide, dits waer,
Soe gheboeret, nu hoort hier naer,
Dat die hertoghe wide bekent
Van Bourgognen als regent
In Hollant ghetoghen was met gheere,
Ende hi daer sijnde quam die meere
Dat die heere van Filwater certein
Als lieutenant ende capitein
Van Gloucestre des hertoghen
Met volke van wapenen vermoghen
Uut Inghelant comen ware al ree,
Ende ware comen tot Zierixzee
Ende meininghe hebbende ende sen
Te treckene bi Vrouwe Jacoppen,
Om met hare in den lande tehant
Jeghen den hertoghe van Brabant
Ende sinen ghehoorsamen ondersaten
Oorloghe te makene in alder maten.
Als van Bourgognen die hertoghe lofsam
Dese niemeere aldus vernam,
Heeft hi hem bereit tehant
Ende van weghen sijns neven van Brabant
Doen bevelen, ghebieden ongheent
Dat men hem volghde als regent
Om te wederstane dIngelsce conroot.
Daer es hi met enen hoope groot
Van volke soe van sijns selfs weghen,
Soe metten Hollanders ghetoghen ieghen
Die Inghelsce, die doen sonder sparen
Tot Brouwershavene comen waren
In Zeelant. Ende als die heere lofsam
Van Bourgognen aldaer quam,
Sonden dInghelsce tot hem, wilt weten,
Enen herault Gloucestere gheheeten,
Die hem seide int openbare:
Oft hem gheliefde met hem dare
Te vechtene op eenich plein,
Van Filwater die heere, haer capitein,
Soude hem verleenen plaetse ende eerde.
Opt welke die hertoghe ter veerde
Sant sinen herault, in lieghe u niet,
Die Bourgognen bi namen hiet,
Toten voorseiden van Filwater ghereit
Ende deden antwerden met moedicheit
Van sinen weghen, verstaet tbediet,
Datten selven van Filwater niet
En behoorde te dien tiden
Hem plaetse te offeren om striden,
Ende datti mechtich ware ghenoech
Om plaetse te nemene na sijn ghevoech,
Ende hem te slane als hi woude,
Als hem dat ghenueghen soude.
Ende daer na es met vroomicheit
Die hertoghe van Bourgognen voorseit
Metten sinen buten scepe ghetreden;
Ende eer die tweedeel waren leden
Van sinen volke, hebbic vernomen,
Uten scepe ende te lande comen,
Soe waren dInghelsce ghebatelliert
Ende quamen den hertoghe ongheviert
Vroomelijc int ghemoet ghetreden.
Doen wart daer alte zeere ghestreden
Ende zunderlinghe ghevochten op dien dach;
Ende die hertoghe, soe hi altoos plach,
Was daer een leeu ende niet een man.
In sijns selfs persoon nochtan
Wert hi in der porssen certein
Seere verlast; maer heer van Villein,
Een vroom riddere sterc ende voorbaer,
Maecte den hertoghe plaetse aldaer,
Ende dede daer in dier selver uren
Vele Inghelsce die doot besuren.
Die hertoghe, met corten woorden, tier tijt
Behielt velt ende wan den strijt.
Van hertoghen Jans weghen in dier noot
En bleef nieman van namen doot
Dan heer Andries van Velly:
Een vroom ridder ende goet was hi.
Maer van der wederpartien conroot
Bleven alle die capiteine doot
Ende alle die meeste min ende meere.
Sanders van Hamstee die heere,
Die den Inghelscen, sijt seker das,
Aldaer te helpen comen was
Met II^m oft daer omtrent
Zeelanders, dat si u bekent,
Die wert ghevanghen daer ter stede,
Ende omtrent II^c Inghelsce mede.
Ende daer bleven in der porssen groot
Omtrent III^m Inghelsce doot,
Ende die herauden te dien tiden,
Die waren van der Inghelscer siden,
Seiden den hertoghe al bloot
Dat dInghelsce, die daer laghen doot,
Uut waren ghesocht, hoordic bedieden,
Voor die bloeme van vroomen lieden
Van den artsiers ende volke bekant
Van wapenen uit Inghelant.
In Zeelant ghesciede dese strijt
Te Brouwershavene, seker sijt,
XIIII^c XXV, doe ic ghewach,
In januario den XIII^en dach.