Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXIX.

Hoe de hertoge van Brabant tregiment der lande Hollant, Zeelant ende Vrieslant sinen neve den hertoge van Bourgognen beval ende overgaf.

Want nu van Brabant die hertoghe rijc
Vernomen hadde dus claerlijc
Dat die van Gloucestre hadde in achte
Over te comene met crachte
Ende hem ende sinen lande
Scade te doene ende scande:
Soe sach hi ane met wijsheiden
Dat hi sijn lande ende heerlicheiden,
Die hi van Gods gracien weghen,
Van sijns selfs ende ooc hadde ghecreghen
Van huwelike, te dier tijt
In sinen persoon, des seker sijt,
Niet wel bedriven, dits ware oorconde,
Noch alle gheregheren en conde,
Ende bedacht mids desen in sinen sen
Ende om andere zekere redenen
Hem daer toe beruerende claer,
Tregement der lande, dits waer,
Van Hollant ende van Zeelant
Te bevelene ende te settene in hant
Sinen neve van Bourgongien -
Die doch der lande meer ende men
Van Hollant, Zeelant, alst soe quame,
Recht oor ware ende erfghename,
Oft ghebeurde, dit versinne,
Dat Vrou Jacop sijn ghesellinne
Aflivich worde in dier maten
Sonder wetteghe gheboorte te laten -:
Hier op heeft men in goeder mate
Sprake ghehouden ende tractate.
Daer op worden brieve ende menuten
Beworpen, ende om die zaken te sluten
Wert een dachvaert tier stonde
Daer af ghehouden te Dendermonde.
Tot welker dachvaert, soe wi vernamen,
Die ghedeputeerde quamen
Der state van Brabant, die meer noch min
Consenteren en wilden daer in,
Het en ware dat die brieve ghemodereert
Redelijc worden ghereformeert;
Mids dat si bevonden claer
Dat voorseide lant niet en waer
Van Brabant in dien brieven certein
Wel besorcht, als van Hoesdein
Ende Sinte Gheertrudenberghe daer toe,
Ende meer andere poente doe.
Ende hoe wel dat hertoghe Jan
Van Brabant bi rade, hout u daer an,
Sijns brueder, des greven, segghic di,
Van Saint Pol ende van Lyney,
Des hertoghen van Cleve, si u becant,
Ende des greven van Conversant,
Heeren Jans van Lutzenborch, dat wet,
Sijnre neven, ende meer ander met
Grooter heeren ende maghe,
Die metten hertoghe te dien daghe
Ende metten greve, hoort mi verclaren,
Alle ieghenwoordich waren,
Van den brieven, als si, sijt seker das,
Beworpen waren, te vreden was,
Ende men den ghedeputeerden
Van den staten van Brabant meer ende men
Vele onderwijs dede daer van:
Soe en wouden si gheensins nochtan
Consenteren daer in in gheenre maten,
Si en hadden ierst bi den staten
Onthaelt daer si af waren ghesonden.
Seghelere van Brabant was tien stonden
Meester Cornelijs Proper sekerlike
Proost der kerken van Camerike;
Die en woude die voorseide brieve dare
Niet bezeghelen, het en ware
Dat die drie state vore vercleert
Van Brabant hadden gheconsenteert.
Soe en wert die zake op tregement
Tot dier dachvaert niet gheent;
Maer op die zaken vore verclaert
Wert een andere dachvaert
In der stat van Mechelen ghehouden.
Die state van Brabant noch en wouden
Daer in engheensins consenteren.
Sonder haer consent ende begheeren
Soe en woude die proost, wats ghesciet,
Van Camerike die brieve niet
Beseghelen, hoort mi verclaren,
Die daer op beworpen waren.
Ende mids dien dede men sonder beide
Te Mechelen, alsoe men seide,
Eenen nuwen zeghel steken, dats waer;
Daer met soe worden die brieve daer
Van den regemente bezeghelt tehant
Van Hollant ende van Zeelant,
Bi wille, bevele ende wetentheit
Shertoghen Jans van Brabant voorseit,
Int iaer Ons Heeren, dat es waer,
XIIII^c XXV openbaer,
In die maent, doe ic ghewach,
Van julio den neghentienden dach.