Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXVIII.

Vanden Niemaren als dat de hertoghe van Gloucestere met groeter macht weder over comen soude.

Hier na int voorseide iaer
XIIII^c XXV, dats waer,
In julio den sevensten dach,
Soe screven doe ic u ghewach
Die voorseide greve van Conversant
Ende Montjouwe, si u bekant,
Te Berghen sijnde, dits ware leere,
Den hertoghe van Brabant haren heere,
Dat daer waer comen hen lieden bi
Een Inghelsman, die seide dat hi
Uut Inghelant ghebannen ware, dats claer:
Die hadde hen gheseght voor waer
Ende op sijn hoot, si u vercleert,
Dat dEngelsce hadden gheconsenteert
Den hertoghe van Gloucestere juist
Een bede van achthondert duist
Saluyte, dit was claer waerhede,
Ende XX duist mans, daer mede
Sijn scande te wrekene ende verdriet
Die hem in Henegouwe was ghesciet,
Daer dInghelsce af hadden int ghemeine
Meer onghenuechten groot ende cleine
Dan om eenegher zaken, hoordic verclaren,
Die hem gheviel in hondert iaren.
Voort screven si dat dInghelsce man die dinc
Hem hadde gheseght, dat die coninc
Van Scotlant hadde ghesekert daer
Ende cortelinghe trouwen soude daer naer
Des hertoghen nichte, dus sout ghescien,
Van Gloucestere, ende dat mids dien
(Dat) die coninc van Scotlant, dit onthoude,
Hem tsinen oorloghe sinden soude
VIII^m mans, ende derghelike
Soude hi hebben zekerlike
Acht duisent lersce, hoort mi verclaren;
Ende dInghelsce die onlancs comen waren
In Vrankerike, laghen in Normandien,
Ende dat si sonder eenich vermien
Comen souden met moede hooghe
Ter stont bi den hertoghe
Van Gloucestere, als si int clare
Vernamen dat hi comen ware
Op dese side der zee, sonder ontbeeren.
Deser ghelike tidinghen oft meeren
Hadden die heeren, hoordic bedieden,
Ooc vernomen van andren lieden
Die te Caleis laghen sonder si,
Ende daer omme screven si
Dese zaken met snellen keere
Den hertoghe van Brabant haren heere,
Dat hi hem daer op mocht aviseeren
Ende raet tot sijnre meester eeren
Daer op nemen in corter tijt,
Ten meesten oorbore ende profijt.
Ende als die hertoghe lofsam
Dese meere hoorde ende vernam,
Dede hi die palen sonder sparen
Sijns lants van Henegouwe bewaren,
Ende steden ende slote ernstelike
Besetten herde wiselike,
Ende bereetscap maken sonder verbeit
Om den hertoghe van Gloucestre voorseit,
Oft hi over te comene waer bedacht,
Te wederstane met sijnre macht.
Ooc sant die hertoghe onvertoghen
Aen van Bourgognen sinen neve vermoghen
Ende becondichde hem met ondersceit
Alle die niemeere voorseit,
Ende bat hem voort, si u bekant,
Om succoers ende bistant;
Twelc van Bourgognen die hertoghe rijc
Hem consenteerde willichlijc
Met goeder herten uut rechter trouwe,
Als hem dies noot ghebeuren soude.