Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXVII.

Hoe de hertoghe van Brabant te Valentijn wert ontfanghen ende hoe de hertoghinne wert ghevuert te Ghent ende hoe de hertoge de gehoorsaemheit ghecreech van Berghen.

Als dit tractaet, sijt seker das,
Ghemaect ende ghesloten was
Ende te Douway ghepubliceert,
Tooch hertoghe Jan onghecesseert
Van daer met sinen gheselscap rike
Tot Valenchijn, daer hi qualike
Met meerder weerdicheit, sonder waen,
Hadde moghen werden ontfaen.
Alle die straten daer hi moest liden,
Waren bestroyt in allen siden
Met cruden welriekende sonder ghetal,
Ende overdect al over al
Met dierbaren lakenen, hoort mi saghen.
Te vele plaetsen, daer ioffrouwen laghen
Ter venstren, was uut rechter minnen
Gheordineert dat si van binnen
Der cameren trocken van beiden siden
Coorden ter straten ende lieten gliden
Van boven neder, dit ghevroede,
Cranssen ende costelike hoede
Op shertoghen hoot ende der ander heeren
Welriekende na herten begheeren.
Als hi af was gheseten na dat
Quamen die wethouwers van der stat
Ende brachten hem zeere minnentlike
Dierbare presenten costelike.
Ende aldus bleef die hertoghe daer
Tot opten derden dach daer naer.
Van daer tooch hi, segghic di,
Voor Berghen int heer te Nymy,
Dat hi daer hadde ghelaten voor tstat.
Daer bleef hi ligghende tot dat
Vrouwe Jacob, alsoe ic vernam,
Uter stat van Berghen quam
In den handen, verstaet den sen,
Van den ghedeputeerden
Shertoghen van Bourgoghen, dits waer.
Doen si quam int heer aldaer
Van Brabant, hoort hier vreemt gheveerte,
Wert si tot haers selfs begheerte
Ierstwerf bracht in goeder trouwe
Bi Inghelbrecht greve te Nassouwe
Ende bi heere Heinrijc, segghic di,
Van der Leck; ende dien bat si
Met weenenden ooghen ontfermelijc
Dat si aen den hertoghe rijc
Van Brabant wouden verwerven dat,
Dat si mochte bliven in enegher stat
Oft eneghen slote aen eneghen cant
Binnen den lande van Brabant,
Daer den hertoghe door sijn houde
Alder best ghelieven soude,
Sonder in handen te comene, siet,
Shertoghen van Bourgognen iet.
Maer dat en mocht haer niet gescien.
Alsoe wert si cort na dien
Van shertoghen vrienden ongheduert
Van Bourgognen te Ghent ghevuert,
Om daer te blivene, dat es waer,
Ende haren staet te houdene daer
Na begrijp des tractaets voorscreven.
Daer es si langhen tijt ghebleven
Maer ten lesten es si, hoort mi verclaren,
Heimelijc van daer ontvaren,
Ende quam in Hollant, met corten woorden,
Als u hier na vercleert sal worden.
Na dat Vrouwe Jacob vore gheruert
Aldus te Ghent was ghevuert
Dede hertoghe Jan van Brabant
Bi heere Inghelbrechte tehant
Van Edinghen die hem was ghetrouwe
Ende bi den joncheere van Montjouwe
Die possessie nemen van sijnre stat
Van Berghen, die welke dat
Van den inghesetenen wiselike
Ontfinghen eede behoorlike,
Na betame, van ghetrouwicheiden
Ende ooc van ghehoorsaemheiden
Tot behoef haers heeren wide becant,
Des hertoghen Jans van Brabant.
Na dit es hertoghe Jan vermoghen
In Brabant met sinen heere ghetoghen.
Ende want Vrou Jacoppen moeder vorscreven
Jeghen hertoghe Janne rebel es bleven,
Dede die hertoghe beslaen sonder cesseren
Tsijnre taflen behoef, ende aresteeren
Al haer goede ende duwaerie, die de vrouwe
Hadde in den lande van Henegouwe
Ende in Hollant ooc voortane,
Ende hi maecte heere Janne
Van Lutzenborch sinen neve ghemeit
Gouverneur van den lande voorseit;
Ende voort oordeneerde hi
Vier commissarise, dat segghic di,
Heere Peetren van Lutzenborch met senne,
Greve van Conversant ende van Brienne,
Ende den joncheere van Montjouwe
Met twee andere ghetrouwe
Die de hertoghe van Bourgongien doe
Ooc ghenuemt heeft daer toe,
Om van den besculdichden aldaer
Informatie te nemene claer
Ende correctie te doene in alder mate
Na uutwisen van den tractate.
Want bi den governeur, dat wet,
Ende den commissarisen met,
Bi der informatien die si ontfinghen,
Besculdichs worden vonden der dinghen
De heere van Haverets sonder si
Ende die heere van Lingy
Heer Willem ende heer Pinckaert
Van Heremeis, si u verclaert,
Lardenoys de Donstene, dat vernem:
Soe worden si ende elc van hen
Rechtvoort ghevanghen sonder verdraghen
Ende haer goede in Henegouwe beslaghen
Tot shertoghen behoef, si u bekant,
Ende de goede die eeneghe in Brabant
Ligghende hadden, si u vercleert,
Waren langhe te voren gheconfiskeert
Ende bekeert tot shertoghen tafle voorscreven,
Som vercocht ende wech ghegheven.