Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXXV.

Vander bullen die de paeus den hertoghe sant ende vanden ambaxiate dat de hertoghe sant te Rome.

Dus hebben die Brabantere met eeren
In absentien shertoghen haers heeren
Hem trouwelijc ghedient, alst voorseit es;
Entie hertoghe es selve, sijts ghewes,
Gheweest, soe ic u dede bekant,
In sinen lande van Hollant,
Van Zeelant ende van Vrieslant met,
Ende [heeft] inne ghenomen ende beset
Na sinen wille, na sijn begheert.
Ende als hi van daer was ghekeert
Tot Antwerpen, si u vercleert,
Heeft hem van Eindoven heer Everaert
Een bulle gebracht, dits ware dinc,
Die hi weerdichlijc ontfinc,
Alst wel beteemde, daer met dat hem
Paeus Merten die vijfste, dit vernem,
Screef ter substantien herde claer,
Dat hem ter ooren comen waer
Dat onder den name sijn
Een bulle, verstaet die redene mijn,
In den lande van Henegouwe, dat wet,
In den sticht van Utrecht ende ooc met
Van Ludeke ende van Camerike
Ghetoont ware openbaerlike
Ende onder tvolc, verstaet den sen,
Ghecondicht, ghelesen soude sijn,
Dat hi thuwelijc, soe ic belide,
Tusscen den hertoghe Humfride
Van Gloucestere ende Vrou Jacoppen
Hertoghinne van Beieren
Soude hebben gheconfirmeert,
Ende thuwelijc vore vercleert
Dat hertoghe Jan, wilt versinnen,
Te voren metter selver hertoghinnen
Aenghegaen hadde ende ghecontraheert,
Bi [s]hertoghen Jans wille vore vercleert
Verclaert soude hebben, verstaet den fijn,
Van engheener weerden te sijn;
Ende want die bulle oft letteren te waren
Van hem comen niet en waren,
Maer waren tonrechte tsiere sceempten groot
Den volke becundicht, dats claer ende bloot:
Soe screef hi hertoghe Janne int clare
Dat sijn wille ende meininghe ware,
Dat die zake des huwelijcs vore ghelesen
Behandelt, gheuut soude wesen
Na die dispositie ende forme, segghic di,
Van den rechte; ende begheerde dat hi
Om der valscer letteren ghenoemt hier voor
Gheen achterdinken noch rancoor
Noch wroeghen en hadde int herte binnen.
Met meer woorden, wilt versinnen,
Redenen ende ondersceit
Begrepen in der bullen voorseit.
Als hertoghe Jan, des en hebt gheen waen,
Die bulle ghehoort hadde ende verstaen,
Was hi van herten wel te vreden,
Ende es te Bruessele van daer ghereden.
Ende daer sijnde, ic seker ben,
Sant hi met eener instructien
Meester Janne Knijst, hoordic lien,
Bacheleer formaet in theologien
Der ordenen van den predekeeren,
Aen den voorseiden paus, hoort mi vercleeren.
Daer heeft hi noch in corten stonden,
Aen den voorscreven paus te Roome ghesonden
Sijn ambassiaet notabelike
Te wetene den bisscop van Camerike,
Meester Janne Bont, si u vercleert,
In beiden den rechten licencieert,
Van Camerike officiael;
Heer Janne Coreman te dien mael
Deken der kerken, si u berecht,
Van Sinte Peeters tAnderlecht,
Meester Godevaerde van Sichenen wel gheleert,
In den weerliken rechte ghelicencieert,
Deken der kerken tSinte Peeters te Beke,
Ende met hen, hoort wat ic spreke,
Heer Jan de Hertoghe een ridder van love
Ende wel bewandelt, heere te Morchove,
Alle raedsliede des hertoghen twaren.
Ende daertoe es met hen ghevaren
Meester Alaert van Wieringhen vroet ende wijs,
Bacheleer in loye, shertoghen secretarijs.
Dese heeren sijn ghetoghen, op dit gome,
Van shertoghen weghen int hof van Rome,
Daer si met grooten coste ende scoonen staten
Langhe bleven ligghende utermaten,
Ende volvolghden die zake wiselike
Van den voorseiden huwelike
Van des hertoghen weghen voorscreven.
Ende hier na es die hertoghe bleven
Van Brabant, als die wide bekande,
Binnen den selven sinen lande
Tot Paesscen toe, soe ic vermane;
Dus selen wi van nu voort ane
Tiaer Ons Heeren scriven, segghic dich,
Veertien hondert vive ende twintich.