Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXIX.

Hoe die hertoge sant tot Parys ende vanden appointemente daer ghemaect dwelcke de voorseide hertoge belieft heeft.

Cort hier na, hoort mi verclaren,
Quamen zekere niemaren
Dat van Gloucestre die hertoghe
Bereetscap maecte met moede hooghe
Om met Jacoppen der Vrouwe
Te comene int lant van Henegouwe
Om[t] met machte te crighene in sijn hant.
Ende als hertoghe Jan van Brabant
Dat vernam, maecte hi certein
Van Haverets den heere capitein
Van Henegouwe, dat was waer.
Ende hi sant cortelinghe daer naer
Sijn notabel bootscap, dit vernem,
Aen den bisscop van Ludeke, om met hem
Te slutene enen dach, sonder si,
Ende zekere plaetsen daer si
Tsamen mochten comen daer naer,
Om deen den anderen te doene daer
Des si, van weghen der greeflicheit
Van Henegouwe, na recht besceit
Elcanderen sculdich te doene waren.
Daer toe die hertoghe sonder sparen
Hem presenteerde bereet te wesen.
Maer die bisscop vore ghelesen
Sette in vertrec, sijts ghewes,
Die zaken, tot dat hi hem des
Met sier Capittelen met staden
Ende sinen lande hadde beraden.
Hertoghe Jan sant ooc, verstaet den sen,
Aen hertoghe Janne van Beieren
Sinen oom, die van sinen weghen in hant
Hollant hadde ende Zeelant,
Die hem willeghen dienst sonder beide
Gheloofde ende toeseide.
Binnen desen quam die niemare
Dat die hertoghe van Gloucestre ware
Met cleinen hoope, dus waest vernomen,
Van volke te Caleys over comen
Ende datti Vrouwe Jacoppen aldaer
Ende sijn ander volc verwachtende waer,
Om te comene met voorseider Vrouwe
Voort tot in tlant van Henegouwe.
Hertoghe Jan sant om dit besorch
Heere Peetren van Lutzenborch
Greve van Conversant, sijts wijs,
Ende van Brienne te Parijs
Toten hertoghe van Bourgognen
Sinen neve om claer beken
Hem te doene van der zaken voorseit,
Ende te biddene datti hem met gonsticheit
Jeghen dien van Glouceestre voorghelesen
Bistaen wilde ende ghehelpich wesen.
Want hertoghe Jan mercte, dit onthoude,
Dat die van Glouceestre niet en woude
Tvonnesse verbeiden, hier op goome,
Van der zaken die hinc int hof van Roome
Maer want hi hem boven die sceemte tot desen
Die hi hem ghedaen hadde ende bewesen,
Noch pijnde tontweldeghen met ontrouwe
Jeghen recht sijn lant van Henegouwe,
Ende ieghen die inhibitie, sijt seker das,
Die hem gheinsinueert was
Van des stoels van Roome weghen:
Soe meindi hem te weerne daer ieghen
Ende bereiden met sinen ghetruwen temale,
Greven, baenrotsen, edelen ende vassale,
Ende trac met hem al onghespaert
Tsinen lande van Henegouwe waert,
Dat hi meer dan VII iaer, wilt weten,
Peiselec ende vredelec hadde beseten,
Om die possessie daer af te behouden,
Ende steden ende sloten, dat wilt onthouden,
Ende fortressen van provancien met gheere
Te versiene ende van gheweere,
Ende tlant van Henegouwe sonder letten
Met sinen lieden te besetten,
Ende te bescuddene met sekerheit
Jeghen dien van Gloucestre voorseit.
Als nu die hertoghe, dit vernem,
Met sinen volke van wapenen
Te Nivele quam, om te trecken voort
In Henegouwe, soe ghi hebt ghehoort,
Quam daer die greve van Conversant
Heere van Edinghen, die was ghesant
Bi den hertoghe, des sijt wijs,
Van Bourgongien te Parijs
Ende bracht brieve van hem, te waren,
Die te Parijs ghescreven waren
Opten negenentwintichsten dach
Der maent octobris, doe ic ghewach;
Daer hi met beteekende claer
Sinen neve van Brabant, hoe dat waer
Bi hem enten hertoghe, sijts vroeder,
Van Bethvort des van Glouceestre broeder,
Gheordineert, si u bekent,
Een zeker tractaet ende apoentement
Om te verhuedene scaden ende plaghen,
Die namaels in toecomenden daghen
Ghescepen waren te ghescien,
En worder niet wijslec op versien:
Dit tractaet was soe redelike
Dat si meinden entelike
Dat hi emmer soude, dat wet,
Ende van Glouceester die hertoghe met
Daer met ghepayt sijn ende te vreden
Bliven, ende met cortheden
Souti hem bibrenghen doen tractaet
Bi sijns selfs ambassiaet
Die hi daer omme cortelijc
Bi hem soude sinden; ende desghelijc
Soude die hertoghe van Bethvort
Tselve tractaect rechte voort
Met sijns selfs lieden zunderlinghen
Sinen brueder doen aenbringhen.
Mits desen bat, verstaet den sen,
Die hertoghe van Bourgognien
Sinen neve van Brabant vriendelike
Met begheerten zeere hertelike
Dat hi alle zaken, dits waer bediet,
Verhielde in state, sonder iet
Met Rigore oft volke van wapenen
Daer in te voorderen meert oft men;
Mer dat hi ter stont sonder verlaet
Vergaderen dede sinen raet
Notabelike na sijn behooren
Tvoorseide apoentement aen te hooren,
Ende daer op tantwerdenen ghereit
Sonder vertrec; want die zaken voorseit
Haest ende ontcommeringhe begheerden,
Ende want die brieve ooc vercleerden
Des hertoghen van Bourgognen voorseit
Credentie ende ghelooflicheit
Opten greve van Conversant
Ende van Brienne vore ghenant,
Ende want hi uut crachte van desen,
Van tshertoghen weghen voorghelesen
Van Bourgognen, bat door houde
Hertoghen Janne dat hi verhouden woude
Dat van siere siden ergenswaer
Dinghen voortghekeert worden, daer
Die zake met mocht worden verswaert.
Want dapoentement vore verclaert
Waer alselc dat men hoopte houde
Dat het beide den partien soude
Wel ghenueghen sonder twifelicheit.
Als hertoghe Jan van Brabant voorseit
Die zake volcomelijc hadde verstaen
Ende hem daer op bedacht, heefti saen
Sijn liede van wapenen, sijts ghewes,
Oorlof ghegheven, ende hi es
Selve van Nivele ghetoghen daer naer
Tot int stat van Lovene, ende daer
Ontboot hi sijn raetsliede te dien male
In scoonen notabelen ghetale,
Ende ooc die wijste van sinen steden,
Om dambassiatuers daer wi af seden
Sijns neven van Bourgognen wide bekent
Te verwachtene ende tapoentement
Te aenhoorne dat se aenbringhen souden,
Ende daer na ten besten hem raden wouden.
Hier na te Lovene comen sijn
Bi hertoghe Janne, dits waerheit fijn,
Van sijns neven weghen eerbaerlike
Die bisscop van Dornike,
Heer Jan van Lutzenborch, nu merke,
Ende heer Roelant van Uutkerke
Heer Willem van Lanoy, ic seker ben,
Riddren; ende daer quam met hen
Van Fourmelles meester Symoen
Doctor in Loye, die aldoen
Den hertoghe van Brabant met goeder stade
Besceidelike ende sinen rade
Bi bracht heeft tvoorseide tractaet
Van poente te poente, dat verstaet,
Ende hem vercleert notabelike,
Ten utersten biddende vriendelike
Van weghen des hertoghen, segghic di,
Van Bourgognen, radende dat hi
Om dorloghe ende alle quaet, sijts vroet,
Te scuwene, ende om alle goet
Van peise tonderhouwene, sijn consent
Daer toe droeghe ende dapoentement
Aenveerden woude; segghende voort
Dat die hertoghe van Bethvoort
Om derselver zaken wille, dit vernem,
Den greve van Suffolck ende met hem
Ander notabele, des sijt vroeder,
Ghesonden hadde aen sinen broeder,
Van Gloucester sonder si.
Soe dat men emmer hoopte dat hi
In dat voorseide apoentement
Draghen soude sijn consent,
Ende dat aenveerden altehant.
Op twelke die hertoghe van Brabant
Met sinen greven met wijsheden,
Baenrotsen, edelen ende goeden steden
Hem heeft beraden, si u bekent;
Ende want tvoorseide apoentement
Onder meer poenten begreep, nu goome,
Dat die zake hanghende int hof van Roome
Daer vervolght soude werden, dat versint,
Ende metten rechte daer gheint,
Ende dat die partien, dit wilt onthouden,
Tvonnesse daer af verwachten souden
Sonder hem te behelpene in gheenre manieren
Met weghen van feite eneghertieren:
Soe heeft hi dat voorseit tractaet,
Daer al inne, als boven staet,
Die juridictie gheestelike
Besorcht was volcomelike,
Aen ghenomen sonder verdaghen,
Ende sijn consent daer in ghedraghen:
Soe verre alst dade ooc tier tijt
Die van Gloucestere, des seker sijt.
Van deser antworden hebben hen
Dambassiatuers van Bourgongien
Den hertoghe Janne ghedanket zeere
Ende oorlof ghenomen met grooter eere.