Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXVIII.

Hoe Gheert vanden Sype gheslegen wert ende doot bleef.

Op S^t Joris dach, sijt seker das,
XXIII in aprille, soe was
Die feeste van Paesscen, wet voor waer,
XIIII^c XXIIII Ons Heeren iaer.
.....
Was van den Zype Gheraert
Van Bruessele toter Vueren ghereden
Bi hertoghe Janne ende int sceeden,
Als hi oorlof hadde ghenomen,
Ende te Bruessele waert soude comen,
Recht boven Stockele een deel
Quam hem tontmoete heer Jan Blondeel
Riddere, die niet en sceen sijn vrient
(Twelc hi licht mocht hebben verdient);
Ende heer Jan Blondeel voorscreven
Hat voormaels te kennen ghegheven
Den voorseiden Gheerde claerlike
Dat hi daer volcomelike
Hem heeft bewesen met moede wreet;
Want vranclijc hi op hem reet.
Gheeraert weerde hem ter steden,
Maer sijn knechten hem ontreden.
Alsoe bleef Gheeraert, dat es waer,
Van heer Janne versleghen daer,
Ende bleef aldaer in den velde
Doot ligghende in onghewelde.
Daer na sijn lichame cortelike
Ghehaelt wert ende heerlike
Ter eerden ghedaen, hier op merke,
Op Coudenberch in Sinte Jacobs kerke.
Die greve van Saint Pol die was gram
Ende droeve, als hi die meere vernam;
Want van Saint Pol dedele heere
Mindene utermaten zeere
Gheeraerde van den Zype voorseit.
Maer cleine halp hem sijn zeericheit
Maer heer Jan, daer wi af scriven,
Moeste slants verdreven bliven.