Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXVI.

Hoe die proofst van Aaken ende meer andere uter ghevanckenessen te Bruesele ontquamen ende hoe de hertoge track te Gerontsberge by sinen neue van Bourgognen.

Als des Heilichs Sacraments dach ghelach,
In junio den derden dach,
Hielt men, als men jaerlijcs pliet,
Groote feeste, en lieghe u niet,
Den Heileghen Sacramente ter eere
Te Bruessele, ende alsoe vele te meere,
Om dat daer es, ic zeker ben,
TSacrament van Miraculen,
Dat die joden voormaels jammerlike
Meshandelden onteemelike;
Daer si omme, alst es becant,
Oude ende jonghe waren verbrant.
Als van den daghe die feeste was leden,
Ende snachts alle man was te vreden
Ende te rasten ghegaen: tier uren
Es die proost van Aken, Jan van Bueren,
Ende Jan van Appelteeren met hem
Ende someghe andere, dit vernem,
Ghebroken uter vankenessen,
Ende snachts in der deemsternessen
Ewech ghetoghen, des sijt wijs,
Des si vroude hadden ende iolijs.
Smorghens als onder tvolc tgheluut
Quam, dat die ghevanghene waren uut,
Soe quam daer af, ic segghe u dat,
Groot rumoer in der stat.
Doch die wethouders van desen
Die ghemeinte soe onderwesen,
Dat sise te vreden hebben ghestelt.
Des selfs vridaeghs vore vertelt
Quam hertoghe Jan, vandic ghescreven,
Van Antwerpen te Lovene in.
Opten XIIII^sten dach alsoe
Der selver maent van junio
Trac hertoghe Jan, dit wilt versinnen,
Van Lovene te Halle binnen,
Ende tot Gheroutsberghe voort;
Daer hi sprake hielt ende woort
Ende hadde vele raets mondelinghe
Met sinen neve sonderlinghe
Van Bourgognen op die zaken
Daer af dat wi hier vore spraken,
Van den ghescille, dits ware dinc,
Dat tusscen hem enten hertoghe hinc
Van Glouceester int hof van Roome.
Van daer trac hertoghe Jan, dit goome,
Weder te Lovene; ende cort daer naer
Quam die bisscop van Ludeke daer
Entie hertoghe van den Berghe tier stont
Om met hem te makene een verbont,
Ende van hem te crighene bistant
Jeghen den hertoghe van Ghelderlant.
Op twelke die hertoghe sonder bliven
Die drie state dede bescriven
Die tot dier saken niet en rieden.
Aldus die heeren van daer scieden
Opten XXI^sten dach, dit es waerheit,
Tooch die hertoghe Jan voorseit
Te Halle, ende voort van daer
Te Berghen in Henegouwe, dats waer,
Ende van Berghen, alsic vernam,
Dat hi weder te Lovene quam.
Van Lovene trac hi in corten uren
In die vriheit van der Vueren;
Daer es hertoghe Jan voorscreven
Eenen langhen tijt ghebleven.