Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXV.

Hoe de hertoghe sant ter dachvaert te Brugghe ende hoe hy selve ter dachvaert tAntwerpen track.

Nu scriven wi Ons Heeren iaer
XIIII^c XXIII, dats waer,
Want IIII in april, doe ic ghewach,
Lach die heilighe Paeschdach.
Daer hielt sijn hooghtijt met minnen
Die hertoghe te Lovene binnen.
XX in aprille, dat segghic di,
Trac hi te Halle, ende van daer sant hi
Den abdt van S^t Machiels, dat wet,
Willeme greve te Zeyne daer met,
Jan heere van Wesemale uut trouwen,
Ende Janne borchgreve te Montjouwen,
Heer Willeme van Sars, des sijt wijs,
Riddere, ende meester Cornielijs
Proper, proost van Camerike,
Ende meester Anselmum derghelike,
Smeets, de welke, sijt seker das,
Doctor in Decreten was
Ende deken van Antwerpen ooc met,
Ende met hen Godefroit Clavet
Tot Brugghe, ter dachvaert, zi u vercleert,
Die bi middele was gheordeneert
Van den hertoghe van Bourgognien
Daer ghehouden te werdene, ic seker ben,
Jeghen dInghelsce, sijt seker das,
Om tghescille, daer ic vore af las,
Tusscen hertoghe Janne, dat versinne,
Ende Vrou Jacoppen sine ghesellinne,
Enten hertoghe van Glouceestere daer toe.
Dese dachvaert diende doe
XXV in aprille, dits waerheit fine,
Des avonts in der herberghen sine,
Om des anderen daeghs, dit versinne,
Te dedinghene, behouden daer inne
Dat proces van der zaken voorseit
Altijt soude bliven in moghentheit
In hove van Roome, hout u daer an,
Tusscen den voorseiden hertoghe Jan
Van Brabant, dit wilt versinnen,
Ende Vrou Jacoppen siere ghesellinnen.
Maer teser dachvaert en conde niet
Die hertoghe van Bourgognien iet
Die ghescille gheappoenteeren.
Aldus scieden daer die heeren.
Opten meidach ongheloghen
Es hertoghe Jan van Halle ghetoghen
Tot Lovene, doe ic u ghewach,
Ende opten neghentienden dach
Van meie trac hi onghespaert
TAntwerpen toter dachvaert,
Die daer diende, si u bekant,
Van den drien staten van Brabant
Jeghen die IIII lede, hoort die wille,
Van Vlaenderen op tvoorseit ghescille
Tusscen Bruessele ende Mechelen voorscreven.
TAntwerpen es die hertoghe bleven.
Hier latic dus den hertoghe bliven,
En sal u hier wat anders scriven.