Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXIII.

Vanden gheschille tusschen Bruesele ende Mechelen ende hoe de Hertoge te Risele ende te Doernike track ende wat hi daer dede.

Hier behoort nu wel te weten
Dat Jan van Groilst die Meyer gheheeten,
Om sijnre mesdaet wille bi hem ghedaen
Ende excessen wille, wilt verstaen,
Voormaels met voorsienicheden
Metten notabelsten deele der steden
Ghebannen was, hout u daer an,
Uten crite van Brabant; na welken ban
Die selve Jan tooch cort daer naer
Te Mechelen woonen, ende aldaer
Ontfinc hi ten selven tien
Die vriheit van der poorterien.
Daer na quam hi, nu hoort dat,
Uut Mechelen der voorseider stat
Tot in dammannie, doe ic u cont,
Van Bruessele, daer hi heeft ghewont
Eenen poorter van Bruessele, in lieghe u niet,
Die David de Rademakere hiet,
Ende trac te Mechelen weder tervaert.
Als dit der stat ghecundicht waert
Van Bruessele, scicte si uut tehant
Des ammans van Bruessele lieutenant
In den name van den Heere, ende tot dien
Vele volcs ghewapent ende wel versien
Van boghen, ghescutte, ende bussen met gheere,
Ende anderen engiene oft gheweere.
Die hebben een sterc huus tier stont
Afgheworpen tot in den gront,
Dat Jan de Meyer, daer wi af lien,
Staende hadde in der ammannien
Ter Cappellen opten bosch, si u vercleert,
Ende sijn goede aldaer ghedestruweert.
Om twelke die van Mechelen saen
Vele poorters van Bruessele, die quamen ghegaen
Uter Antwerpscer marct ende ghereden,
Ghearesteert hebben in haer steden
Ende vele goeds inneghehaelt na das
Datter poorters van Bruessele was.
Die van Bruessele daer na tehant
Hebben weder op hen ghepant,
Ende hebben verboden houde
Dat men hen niet toe vueren en soude
Door dammannie lude oft stille.
Om af te legghene dese ghescille
Sijn vele dachvaerde, hoort den sen,
Tusscen den hertoghe van Bourgognien
Ende van Brabant ghehouden tehande
Ende harer beider lande
Van Brabant ende Vlaenderen mede.
Ten utersten hebben hem beide die stede
In beide haer heeren ghesubmitteert
Van Brabant, van Bourgognen vore vercleert,
Ende in van Vlaenderen die IIII lede
Ende in die IIII goede stede,
Lovene, Antwerpen, ende ooc, dat wet,
SHertoghenbossche ende Thienen met.
Welke partien gheruert langhe eere
Die voorseide saken ende andere meere
Met grooten processen, verstaet den sen,
Bedinght hebben. Maer ten utersten
Maecten si onderlinghe vrede
Ende minlijc acoort, daer si mede
Te vreden quamen, hoort mi verclaren,
Ende bleven eenen tijt van iaren.
Om der ghescille wille, sijts ghewes,
Hielt men vele dachvaerde, als voorseit es,
Ende metten iersten, si u verclaert,
Hielt men te Risele een dachvaert.
Daer trac hertoghe Jan, doe ic ghewach,
Van Lovene op eenen donderdach,
XIX in novembri, met grooter eeren
Verselt van vele grooter heeren,
Van vele greven, hoort den sen,
Baenrotsen, ridderen, edelen,
Ende heeft daer, dat si u vercleert,
Van den ghescille ghetracteert
Met sinen neve, si u bekant;
Soe dat ghestelt waert in bestant
Ende een ander dachvaert ten termine
Was gheordineert tAntwerpen tsine.
Maer eer men van Risele sciet,
Tracteerde, ic en lieghe u niet,
Die hertoghe Jan ende hielt sprake
Van der huweliker zake
Met sinen neve van Bourgognien
Die hi hadde, ic seker ben,
Jeghen Vrouwe Jacoppen doe
Siere ghesellinnen, ende daer toe
Den hertoghe van Glouceestre, dit goome,
Hanghende in den hove van Roome.
Des saterdaeghs XXVIII^en, sijts ghewis,
Der voorseider maent novembris
Es van Brabant die hertoghe rike
Van Risele comen te Dornike,
Daer hem bewesen weert groote eere:
Twee milen weeghs ende meere
Quamen die poorteren met weerdicheden
Jeghen den hertoghe uutghereden;
Ende als hi naerder quam der stat,
Quamen si ghemeinlijc, hoort dat,
Uter stat hem ieghen sonder vermanen
Met processien, met crucen, met vanen.
Hi dede gracie, hoort mi verclaren,
Den ghenen die daer ghebannen waren,
Die ghevanghene die saten, hier op ghisse,
In sconincs of [s]bisscops vanghenesse,
Oft in der stat ooc te dier tijt,
Die gaf hi alle los ende quijt.
Entie stat scincte hem, sijts vroet,
Wijn ende costelike lakene goet,
Ende vasseele van zilvere claer,
Seere costelike juweele voorwaer.
Doen trac die hertoghe in goeder trouwen
Van daer te Berghen in Henegouwen;
Van daer te Halle, ende daer naer
Tot Lovene, ende weder van daer
Trac hi te Berghen, doe ic u cont,
Ende opten heileghen Kerssavont
Quam hi weder te Lovene, si u vertelt;
Alwaer hi doen sijn hooghtide helt.
Ende met sinen state, dus eest bescreven,
Es hi daer tot Paesscen bleven.